ព័ត៌មានជាតិ
ជប៉ុន ប្រកាសផ្តល់ជំនួយ៣,៣១លានដុល្លារ លើគម្រោងអាហារូបករណ៍អភិវឌ្ឍន៍ធនធានមនុស្សកម្ពុជា
(ភ្នំពេញ)៖ រដ្ឋាភិបាលជប៉ុនបានសម្រេចផ្តល់ហិរញ្ញប្បទានឥតសំណងដល់កម្ពុជា ចំនួន ៣៦២ លានយ៉េន ស្មើនឹង ៣,៣១លានដុល្លារអាមេរិក ដើម្បីប្រើប្រាស់លើគម្រោងអាហារូបករណ៍អភិវឌ្ឍន៍ធនធានមនុស្ស ។
ការផ្តល់ហិរញ្ញប្បទានឥតសំណងនេះនឹងត្រូវចុះហត្ថលេខានៅថ្ងៃទី២៦ ខែកក្កដា ឆ្នាំ២០២១ ខាងមុខ ដោយលោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិរបស់កម្ពុជា ជាមួយនឹងលោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំនៅប្រទេសកម្ពុជា ។
សេចក្តីប្រកាសព័ត៌មានរបស់ក្រសួងការបរទេសរបស់កម្ពុជានៅថ្ងៃនេះបានបញ្ជាក់ថា ការផ្តល់ហិរញ្ញប្បទានឥតសំណងពីរដ្ឋាភិបាលជប៉ុននេះ នឹងចូលរួមចំណែកយ៉ាងសំខាន់នៅក្នុងការលើកម្ពស់ការអភិវឌ្ឍន៍ធនធានមនុស្សនៅកម្ពុជា ក៏ដូចជាជួយពង្រឹងបន្ថែមទៀតនូវកិច្ចសហប្រតិបត្តិការជិតស្និទ្ធ និងចំណងមិត្តភាពជាប្រពៃណីរវាងប្រទេសទាំងពីរផងដែរ ។
ដោយឡែក ថ្មីៗនេះជប៉ុនក៏បានប្រកាសផ្តល់ជំនួយវ៉ាក់សាំង AstraZeneca ចំនួន១លានដូស ដែលនឹងត្រូវដឹកមកដល់កម្ពុជានៅថ្ងៃសុក្រនេះ ។
ក្នុងវិស័យសុខាភិបាល ជាពិសេសក្នុងយុទ្ធនាការប្រឆាំងកូវីដ-១៩ លោក មិកាមិ ម៉ាសាហ៊ីរ៉ូ បានលើកឡើងថា ជប៉ុនបានផ្តល់ជំនួយសរុបជាង៥០លានដុល្លារអាមេរិកដល់កម្ពុជា រួមមានបរិក្ខារពេទ្យ ការកែលម្អមន្ទីរពេទ្យ ការគាំទ្រគម្រោងរបស់អង្គការអន្តរជាតិនានាសម្រាប់វិធានការទប់ស្កាត់ការចម្លងជំងឹតាមព្រំដែន ក៏ដូចជាការផ្តល់បរិក្ខារសម្រាប់ដឹកជញ្ជូន និងការរក្សាទុកវ៉ាក់សាំងឱ្យបានត្រឹមត្រូវ ៕
ភ្ញៀវទេសចរអន្តរជាតិមកកម្ពុជានឹងឈានដល់កម្រិតមុនជំងឺរាតត្បាតនៅឆ្នាំ២០២៦
ឯកឧត្តម កង សៅគុណ បាននាំយកទូកម៉ាស៊ីន១គ្រឿងដើម្បីបម្រើប្រជាពលរដ្ឋក្រីក្រនៅក្នុងឃុំពុទ្រា
ប្រមុខរាជរដ្ឋាភិបាលកម្ពុជាសម្រេចផ្តល់ប័ណ្ណក្រីក្រីប្រភេទ១ដល់ប្រជាពលរដ្ឋទាំងអស់ ដែលស្ម័គ្រចិត្តរើចេញពីតំបន់រមណីយដ្ឋានអង្គរទៅរស់នៅតំបន់ធម្មជាតិរុនតាឯក
ប្រទេសចិនបានរៀបចំវេទិកាសង្គមស៊ីវិលអន្តរជាតិក្រោមគម្រោងសុខភាពសាធារណៈ
ទីក្រុងព្យុយ៉ាងចោទអាមេរិកថាកំពុងសម្ព័ន្ធយោធាណាតូនៅអាស៊ី
