អង់គ្លេស៖ ពលរដ្ឋរអង់គ្លេសរស់នៅប្រទេសអាហ្វហ្កានីស្ថាន គួរចាកចេញ ជាបន្ទាន់

(ឡុងដ៍)៖ រដ្ឋាភិបាលអង់គ្លេសបានផ្ដល់យោបល់ឱ្យពលរដ្ឋអង់គ្លេសទាំងអស់កំពុងរស់នៅ ឬស្នាក់នៅក្នុងប្រទេសអាហ្វហ្កានីស្ថាន ចាកចេញពីប្រទេសមួយនេះជាបន្ទាន់ ដោយសារបារម្ភពីសន្តិសុខ ខណៈកងកម្លាំងរដ្ឋាភិបាល និងក្រុមតាលីបង់កាន់តែបង្កើនការវាយប្រហារដាក់គ្នាទៅវិញទៅមក។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសៅរ៍ ទី០៧ ខែសីហា ឆ្នាំ២០២១។

ការិយាល័យការបរទេស រដ្ឋ Commonwealth និងការអភិវឌ្ឍនៃចក្រភពអង់គ្លេសផ្ដល់យោបល់ខាងលើ នៅក្នុងការធ្វើបច្ចុប្បន្នភាពមួយ លើគេហទំព័ររបស់ខ្លួន ដោយប្រាប់ឱ្យពលរដ្ឋអង់គ្លេស ចាកចេញពីប្រទេសអាហ្វហ្កានីស្ថាន។ ការិយាល័យដដែលនេះ បានគូសបញ្ជាក់ដូច្នេះថា៖ «ពលរដ្ឋអង់គ្លេស ឬអ្នកមានសញ្ជាតិអង់គ្លេសទាំងអស់ ត្រូវបានផ្ដល់យោបល់ឱ្យចាកចេញពីអាហ្វហ្កានីស្ថានជាបន្ទាន់ ពីព្រោះតែស្ថានការណ៍សន្តិសុខនៅក្នុងប្រទេសមួយនេះកាន់អាក្រក់ឡើង»។

គួរបញ្ជាក់ថា បច្ចុប្បន្ន ក្រុមសកម្មប្រយុទ្ធតាលីបង់ កំពុងគ្រប់គ្រងតំបន់ជនបទមួយភាគធំ នៃប្រទេសអាហ្វហ្កានីស្ថាន ហើយបានប្ដូរយុទ្ធសាស្ត្រងាកមកបង្កើនការវាយលុក ដណ្ដើមកាន់កាប់ទីក្រុងជាច្រើន ក្នុងនោះមានដូចជាទីក្រុង Herat និងទីក្រុង Lashkar Gah ស្របពេលកងទ័ពអាមេរិកនឹងត្រូវដកចេញទាំងស្រុងនៅត្រឹមចុងខែសីហានេះ។

ដោយ គង់ សុខឡេង៕