មន្ទីរទេសចរណ៍ខេត្តស្ទឹងត្រែងណែនាំឱ្យប្រជាសហគមន៍ផ្សោតព្រះរំកិល អភិរក្សសត្វផ្សោត

ស្ទឹងត្រែង៖ សត្វផ្សោតរស់នៅតំបន់អភិរក្ស អន្លង់ឈើទាល ឃុំព្រះរំកិល នៅសល់តែមួយក្បាលតែប៉ុណ្ណោះ ហើយមន្ទីរទេសចរណ៍បាន ណែនាំឱ្យប្រជាសហគមន៍រមណីយដ្ឋានទេសចរណ៍ផ្សោតព្រះរំកិល បង្កើនកិច្ចសហការរួមគ្នា ធ្វើការអភិរក្សទុកបម្រើឱ្យវិស័យ ទេសចរណ៍។ ក្នុងឱកាសចុះពិនិត្យឆ្អឹងសំណាកសត្វផ្សោតនៅឃុំព្រះរំកិលខេត្តស្ទឹងត្រែង ថ្ងៃទី០៧សីហានេះ លោក អ៊ន ប៉ោសឿន ប្រធានមន្ទីរ ទេសចរណ៏ខេត្តស្ទឹងត្រែង បានស្នើឱ្យមន្ត្រីជំនាញខណ្ឌជលផលខេត្ត និងអង្គការ(WWF )អភិរក្សសត្វផ្សោតជាដៃគូ ជួយរិះរកយន្តការពារ សត្វផ្សោតបន្ថែម ព្រោះបច្ចុប្បន្នមានអ្នកនេសាទឡាវចេះតែមក(ដាក់មង- ចងសន្ទូច)ក្នុងអន្លង់អភិរក្ស និងមានទូកបើកបំពងសម្លេងខ្លាំងៗ ឆ្លងកាត់តាមតំបន់សត្វផ្សោតរស់នៅ។

លោកបន្តថា រមណីយដ្ឋានទេសចរណ៍មួយនេះ ប្រសិនបាត់បង់សត្វផ្សោតទាំងស្រុងនោះ អាចបង្កបញ្ហាប្រឈមទៅនឹងការបាត់បង់ ភ្ញៀវទេសចរដែរ ព្រោះកន្លងមកភ្ញៀវភាគច្រើនមកទស្សនាចង់ឃើញសត្វផ្សោតមេគង្គតែប៉ុណ្ណោះ។ លោក ផយ វណ្ណា អ្នករៀបចំសេវាកម្មដឹកជញ្ជូនភ្ញៀវទេសចរបានអះអាងថា ប្រជាសហគមន៍បានប្រឹងប្រែងអភិរក្សហើយ តែភាគីឡាវ ចេះតែយក (មង ឬសន្ទូច) មកដាក់យកត្រី នៅជិតតំបន់អភិរក្សសត្វផ្សោតយើងនេះ ដែលបង្កផលប៉ះពាល់ដល់សត្វផ្សោត ហែលប្រដេញចាប់ត្រីជាអាហារ ។ លោកបន្តថា៖សមាជិកសហគមន៍កំពុងរិះរកយន្តការដោះស្រាយរួមគ្នា ដើម្បីបញ្ចៀសកុំឱ្យសត្វផ្សោត ដ៏កម្រនេះវាបាត់បង់តទៅទៀត ព្រោះបច្ចុប្បន្ននៅសល់តែ១ក្បាលប៉ុណ្ណោះ ព្រោះនៅដើមឆ្នាំ២០២១កន្លងមកបានស្លាប់ចំនួន២ក្បាលទៅហើយ។ លោកសូមអំពាវនាវទៅអង្គការ(WWF)ជាដៃគូ ជួយអភិរក្សនូវឆ្អឹងសត្វផ្សោតទុកជាភស្តុតាង សម្រាប់អ្នកជំនាន់ក្រោយបានឃើញ និង បានស្គាល់។

សូមបញ្ជាក់ថា ខេត្តស្ទឹងត្រែងមានតំបន់រមណីយដ្ឋានទេសចរណ៍ធម្មជាតិសត្វផ្សោត អន្លង់ឈើទាលព្រះរំកិលនេះ ដែលបានបើក ដំណើរការជូនភ្ញៀវទស្សានាជាង១០ឆ្នាំមកហើយ និងនៅចំនួន៣កន្លែងទៀត ដូចជា អន្លង់ផ្សោត ត្បូងខ្លា កោះកាំងកូនចាប និង កោះសន្ទក់ ពុំទាន់រៀបចំជារមណីយដ្ឋាននៅឡើយទេ៕