Connect with us

ព័ត៌មានទាន់ហេតុការណ៍

ចិនទទួចឱ្យអន្តរជាតិដកទណ្ឌកម្ម ខណៈកូរ៉េខាងជើងកំពុងប្រឈមមុខនឹងវិបត្តិស្បៀងអាហារ

(ប៉េកាំង)៖ ប្រទេសចិនបានអំពាវនាវសាជាថ្មី ឱ្យសហគមន៍អន្តរជាតិដកទណ្ឌកម្មសេដ្ឋកិច្ចពីកូរ៉េខាងជើង ដោយសំអាងលើវិបត្តិស្បៀងអាហារ ហើយបានឆ្លៀតចោទប្រកាន់សហរដ្ឋអាមេរិកថា ជាអ្នកបង្កភាពតានតឹងនៅក្នុងតំបន់ តាមរយៈគម្រោងធ្វើសមយុទ្ធយោធារួមគ្នាជាមួយកូរ៉េខាងត្បូង។ នេះបើតាមការចេញផ្សាយ ដោយសារព័ត៌មាន South China Morning Post នៅថ្ងៃសៅរ៍ ទី០៧ ខែសីហា ឆ្នាំ២០២១។

នៅក្នុងសេចក្ដីថ្លែងការណ៍តាមប្រព័ន្ធអនឡាញ ជាមួយក្រុមរដ្ឋមន្ត្រីការបរទេសអាស៊ាន នៅថ្ងៃសុក្រ  សប្ដាហ៍នេះ  រដ្ឋមន្ត្រីការបរទេសចិន លោក វ៉ាង យី បានលើកឡើងថា ការធ្វើសមយុទ្ធយោធារួមគ្នាអាចនឹងបំផ្លាញកិច្ចខិតខំប្រឹងប្រែងដោះស្រាយភាពតានតឹងនៅលើឧបទ្វីបកូរ៉េ។ លោក វ៉ាង យី បានគូសបញ្ជាក់បន្ថែមដូច្នេះថា៖ «ប្រសិនបើសហរដ្ឋអាមេរិកពិតជាចង់ស្ដារឡើងវិញនូវកិច្ចចរចាជាមួយកូរ៉េខាងជើងពិតមែន ច្បាស់ណាស់ពួកគេមិនគួរធ្វើសកម្មភាពទាំងឡាយណា ដែលបង្កឱ្យមានភាពតានតឹងនោះទេ។ កូរ៉េខាងជើងបានបញ្ឈប់ការធ្វើតេស្ដអាវុធនុយក្លេអ៊ែរ និងមីស៊ីលរយៈចម្ងាយឆ្ងាយហើយដែរ ដូច្នេះ មធ្យោបាយដោះស្រាយភាពជាប់គាំងដ៏មានប្រសិទ្ធភាពនោះ គឺការដកទណ្ឌកម្មសេដ្ឋកិច្ចរបស់ក្រុមប្រឹក្សាសន្តិសុខអង្គការសហប្រជាជាតិពីកូរ៉េខាងជើង»។

គួរបញ្ជាក់ថា កូរ៉េខាងជើងកាលពីសប្ដាហ៍មុន បានព្រមានថា ការធ្វើសមយុទ្ធយោធារវាងសហរដ្ឋអាមេរិក និងកូរ៉េខាងត្បូងដែលគ្រោងនឹងធ្វើឡើងនៅក្នុង ខែសីហានេះ អាចនឹងបំផ្លាញដល់កិច្ចខិតខំប្រឹងប្រែងស្ដារទំនាក់ទំនងរវាងកូរ៉េទាំង២ឡើងវិញ។ ជាការឆ្លើយតប ក្រសួងការពារជាតិកូរ៉េខាងត្បូងបានឱ្យដឹងថា ទីក្រុងសេអ៊ូល និងទីក្រុងវ៉ាស៊ីនតោន កំពុងជជែកគ្នាពីគម្រោងធ្វើសមយុទ្ធយោធារួមគ្នា ប៉ុន្តែមកទល់នឹងពេលនេះមិនទាន់មានការសម្រេចចិត្តណាមួយនោះទេ។ ដោយ គង់ សុខឡេង៕

 

Click to comment

Leave a Reply

Your email address will not be published.

Facebook