ព័ត៌មានជាតិ
សំបុកសត្វត្រយងយក្ស១០សំបុក ត្រូវបានប្រទះឃើញក្នុងដែនជម្រកសត្វព្រៃលំផាត់
(ភ្នំពេញ)៖ គម្រោងនៅកម្ពុជារបស់អង្គការសត្វស្លាបអន្តរជាតិ (Birdlife International Cambodia Program) នៅថ្ងៃនេះ បានឱ្យដឹងថា សត្វត្រយងយក្ស គឺជាប្រភេទបក្សីដែលជិតផុតពូជបំផុតមួយនៅលើពិភពលោក ហើយបក្សីប្រភេទនេះ ក៏ជានិមិត្តរូបបក្សីតំណាងអត្តសញ្ញាជាតិរបស់កម្ពុជាផងដែរ។ ដោយឡែកដែនជម្រកសត្វព្រៃលំផាត់បាន និងកំពុងគាំទ្រដល់ការរស់នៅរបស់សត្វត្រយងយក្សរបស់កម្ពុជានេះ។
បើតាមប្រភពខាងលើ ក្រុមការងារអង្គការសត្វស្លាបអន្តរជាតិ នៅដែនជម្រកសត្វព្រៃលំផាត់ បាននិងកំពុងប្រឹងប្រែងយ៉ាងខ្លាំងក្នុងស្វែងរក និងកំណត់ទីតាំងពងកូនរបស់បក្សីត្រយងយក្សនេះ ដើម្បីងាយស្រួលក្នុងការការពារក៏ដូចជាការរៀបចំផែនការសម្រាប់សកម្មភាពនាពេលខាងមុខ។ ដោយហេតុថាសត្វនេះពងកូននារដូវវស្សា ដូច្នេះការសិក្សាស្វែងរកមានការលំបាកខ្លាំង និងទាមទារការប្រឹងប្រែងខ្ពស់។ ប៉ុន្តែជាលទ្ធផលសំរាប់រដូវកាលពងកូន ឆ្នាំ២០២១នេះ បន្ទាប់ពីការខិតខំប្រឹងប្រែងអស់រយៈពេល៣ខែកន្លងមក សំបុកសត្វត្រយងយក្សចំនួន១០សំបុក ត្រូវបានរកឃើញនៅក្នុងដែនជម្រកសត្វព្រៃលំផាត់ ហើយសំបុកមួយចំនួនត្រូវបានញាស់ និងមួយចំនួនទៀតកំពុងក្រាបពងផងដែរ ក្រោមការតាមដាន និងការពារយ៉ាងយកចិត្តទុកដាក់ពីបុគ្គលិកទីវាលរបស់អង្គការ។
អង្គការសត្វស្លាបអន្តរជាតិ (Birdlife International Cambodia Program) បញ្ជាក់ថា រដូវពងកូនឆ្នាំនេះនឹងបញ្ចប់នៅខែវិច្ឆិកា ហើយក្រុមការងារសង្ឃឹមថា សំបុកសត្វនេះអាចរកឃើញច្រើនថែមទៀត និងទទួលបានតាមដាន និងការពារពីក្រុមការងារ។ ខណៈដែលក្រុមការងារធ្វើការស្រាវជ្រាវ និងអភិរក្សបក្សីកម្រនេះយ៉ាងលំបាក អង្គការ BirdLife និងអង្គការជីវិតធម្មជាតិនៅកម្ពុជា សំណូមពរដល់ប្រជាសហគមន៍ អាជ្ញាធរមូលដ្ឋាន សូមចូលរួមថែរក្សារការពារបក្សីជាតិយើងទាំងអស់គ្នា ដោយទប់ស្កាត់ និងមិនទន្រ្ទានដីដែលធ្វើឱ្យបាត់បង់ទីជម្រក មិនយកពងកូន និងមិនបង្កការរំខានដល់ការរស់នៅរបស់ត្រយងយក្សជាដើម។
ព្រះរាជាណាចក្រកម្ពុជា បានសម្រេចយក ត្រី ល្មូន ដើមឈើ ផ្លែឈើ បក្សី សត្វព្រៃ និងផ្កា មួយចំនួនជាតំណាងឱ្យអត្តសញ្ញាណជាតិខ្មែរ។ ក្នុងនោះ ត្រយ៉ងយក្ស ត្រូវបានជ្រើសរើសតំណាងឱ្យបក្សី (មរត៌កធម្មជាតិ)។ នេះបើតាមអនុក្រឹត្យចុះថ្ងៃទី២១ ខែមីនា ឆ្នាំ២០០៥៕
សម រង្ស៊ី ត្រូវបានបណ្តេញចេញ ពីម៉ាឡេស៊ីហើយ
ហ្វាំងឡង់ដ៍ អង្គការណាតូ ធ្វើសមយុទ្ធយោធាជាប់ព្រំដែនរុស្ស៊ី
មនុស្សបីនាក់ស្លាប់ក្នុងការវាយប្រហារថ្មីរបស់រុស្ស៊ីមកលើទីក្រុងគៀវ
កម្មវិធីសម្ពោធសាលាដំណាក់សមត្ថិផលថ្មី ប្រសូតចេញពីការរួមគ្នារបស់ពុទ្ធសាសនិកជន
នំបញ្ចុកសៀមរាប ផលិតឡើងតាមរូបមន្តពីបុរាណរបស់អ្នកឃុំព្រះដាក់ ត្រៀមចុះបញ្ជីម៉ាកសមូហភាព ដើម្បីលើកកម្ពស់ភាពប្រកួតប្រជែងនៅលើទីផ្សារ
