សាខាកាកបាទក្រហមកម្ពុជាខេត្តស្ទឹងត្រែង នាំយកអំណោយមនុស្សធម៌ ចែកជូនដល់ប្រជាពលរដ្ឋ ចំនួន ៥៧គ្រួសារ ដែលមានសមាជិកគ្រួសារវិជ្ជមានកូវីដ-19 និងកំពុងត្រូវដាក់ខ្លួន ១៤ថ្ងៃធ្វើចត្តាឡីស័កនៅតាមផ្ទះ

ស្ទឹងត្រែង៖ កាលពីថ្ងៃទី២៣ ខែសីហា ឆ្នាំ២០២១ម្សិលមិញនេះ លោក សាយ ព្រលឹង នាយកប្រតិបត្តិសាខាកាកបាទក្រហមកម្ពុជាខេត្តស្ទឹងត្រែង បានដឹកនាំក្រុមប្រតិបត្តិការសាខា សហការណ៍ជាមួយ អនុសាខាក្រុងស្ទឹងត្រែង បានចុះនាំយកអំណោយមនុស្សធម៌របស់សាខាកាកបាទក្រហមកម្ពុជាខេត្ត ជូនដល់ប្រជាពលរដ្ឋ ចំនួន ៥៧គ្រួសារ ដែលមានសមាជិកគ្រួសារវិជ្ជមានកូវីដ-19 ហើយត្រូវដាក់ខ្លួនចត្តាឡីស័កនៅផ្ទះរយៈពេល ១៤ថ្ងៃ ក្នុងកំឡុងពេលបិទខ្ទប់ក្រុងស្ទឹងត្រែង ដំណាក់កាលទី១ ក្នុងសង្កាត់ចំនួន២ រួមមាន សង្កាត់សាមគ្គី ចំនួន ២៧គ្រួសារ និងសង្កាត់ស្រះឬស្សី ចំនួន ៣០គ្រួសារ ក្នុងក្រុងស្ទឹងត្រែង ខេត្តស្ទឹងត្រែង ។

អំណោយមនុស្សធម៌របស់សាខាកាកបាទក្រហមកម្ពុជាខេត្ត ជូនដល់ប្រជាពលរដ្ឋដែលមានសមាជិកគ្រួសារវិជ្ជមានកូវីដ-19 ខាងលើ ដោយក្នុងមួយគ្រួសារៗទទួលបាន អង្ករ១០ គីឡូក្រាម មី១០កញ្ចប់ ទឹកត្រី១យួរ ទឹកសៀវអ៊ីវ១យួរ ក្នុងនោះផងដែរសាខាក៏បាន ភ្ជាប់ជូននូវសារគន្លឹះសំខាន់ៗរបស់កាកបាទក្រហមកម្ពុជា ស្តីពីវិធានអប់រំសុខភាព និងទប់ស្កាត់ការរីករាលដាលនៃកូវីដ-19 ផងដែរ ។

ឆ្លៀតក្នុងឱកាសនោះ លោក សាយ ព្រលឹង នាយកប្រតិបត្តិសាខាកាកបាទក្រហមកម្ពុជាខេត្តស្ទឹងត្រែង បានពាំនាំមកនូវប្រសាសន៍ផ្តាំផ្ញើសួរសុខទុក្ខពីសំណាក់ឯកឧត្តម ម៉ុម សារឿន ប្រធានគណៈកម្មាធិការសាខា ព្រមទាំងលោកជំទាវ គង់ សំអាត ម៉ុមសារឿន អនុប្រធានគណៈកម្មាធិការសាខា ដែលជានិច្ចកាល ឯកឧត្តមប្រធាន ព្រមទាំងលោកជំទាវ តែងតែគិតគូរយកចិត្តទុកដាក់ពីសុខទុក្ខរបស់បងប្អូនប្រជាពលរដ្ឋជួបការលំបាក អ្នកមានជំងឺ ជនងាយរងគ្រោះ និងជនរងគ្រោះដោយជំងឺឆ្លងផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ ជាពិសេសក្នុងស្ថានភាពដ៏លំបាក់នៃការរីករាលដាលនៃជំងឺកូវីដ-១៩ នៅក្នុងសហគមន៍ ៕