ការពង្រីកផ្លូវរត់ព្រលានយន្តហោះព្រះសីហនុ បញ្ចប់ការសាងសង់ដោយនឹងបើកដំណើរការចុងឆ្នាំនេះ

ការពង្រីក និងជួសជុលផ្លូវរត់(Runway) នៃអាកាសយាន្តដ្ឋានអន្តរជាតិ ខេត្តព្រះសីហនុ បានបញ្ចប់ការសាងសង់ជាស្ថាពរហើយ ដោយគ្រោងបើកដំណើរការជាផ្លូវការនៅត្រីមាសចុងក្រោយ ឆ្នាំ២០២០។ នេះបើយោងតាមរដ្ឋបាលខេត្តព្រះសីហនុ។

ពិធីសូត្រមន្តប្រោះព្រំ ការបញ្ចប់ការងារពង្រីក និងជួសជុលត្រូវបានធ្វើឡើងកាលពីថ្ងៃទី១៣ តុលា នេះ ក្រោមអធិបតីភាព ឯកឧត្ដម ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការអាកាសចរណ៍សុីវិល និង ឯកឧត្តម គួច ចំរើន អភិបាលខេត្តព្រះសីហនុ។

ផ្លូវរត់យន្តហោះ(Runway)នេះ ត្រូវបានពង្រីក និងជួសជុលក្រោមការវិនិយោគទឹកប្រាក់ ៥៨ លានដុល្លារអាមេរិក ដែលពង្រីកពីប្រវែង ២ ៥០០ ម៉ែត្រ ទៅ ៣ ៣០០ ម៉ែត្រ ដើម្បីអនុញ្ញាតឲ្យយន្តហោះខ្នាតធំចុះចត និងហោះចេញបានងាយស្រួលជាងមុន ពោលគឺដើម្បីឆ្លើយតបទៅនឹងកំណើនអ្នកដំណើរ។

ការពង្រីកផ្លូវរត់នេះ ធ្វើឱ្យអាកាសយាន្តដ្ឋាននេះ មានសមាសភាពអាចទទួលការចុះចតយន្តហោះធំៗ (កូដ E) ដូចជាយន្តហោះ B-777-300ER រឺយន្តហោះ A-350- 1000 ដែលធ្វើប្រតិបត្តិការហោះហើរត្រង់រយៈចម្ងាយឆ្ងាយទៅមកពីអាកាសយានដ្ឋានអន្តរជាតិខេត្តព្រះសីហនុ។

បើយោងតាមទិន្នន័យរបស់ក្រុមហ៊ុនអាកាសចរណ៍កម្ពុជា នៅចន្លោះឆ្នាំ ២០១៥ និង ២០១៩ អ្នកដំណើរបានកើនឡើងពី ៩៤ ០០០នាក់ ដល់ជាង ១,៦ លាននាក់ ហើយអាកាសយានដ្ឋានខេត្តព្រះសីហនុមានកំណើនក្នុងតួលេខ ៣ខ្ទង់ ស្ទើរតែរៀងរាល់ឆ្នាំ។

នាយកប្រតិបត្តិក្រុមហ៊ុនអាកាសចរណ៍កម្ពុជាលោក Alain BRUN ថ្លែងថា៖ «ដើម្បីអភិវឌ្ឍខេត្តព្រះសីហនុឱ្យមាននិរន្តភាព អាកាសយានដ្ឋានគឺជារឿងមួយដែលចាំបាច់។ ដូច្នេះ ការពង្រីកផ្លូវរត់ គឺជាឱកាសធ្វើឱ្យអាកាសយានដ្ឋានខេត្តព្រះសីហនុអាចទទួលយន្តហោះធំៗ និងហោះហើរពីឆ្ងាយជាមុន ដូចជាអ៊ឺរ៉ុបជាដើម»។

ជាមួយគ្នានេះផងដែរ Cambodia Airports ក៏ធ្លាប់បានបង្ហាញប្លង់មេ នៃការអភិវឌ្ឍអាកាសយានដ្ឋានព្រះសីហនុ រយៈពេលម្ភៃឆ្នាំទៅមុខ រហូតដល់ឆ្នាំ ២០៤០ ដើម្បីពង្រីងសមត្ថភាព អាកាសយានដ្ឋានអន្តរជាតិនេះផងដែរ ៕