លោក ង៉ែត ចាន់សុខ ប្រធានការិយាល័យយុវជន នៃមន្ទីអប់រំយុវជននិងកីឡា បំពាក់កន្សែងជូន សមាជិកកាយរិទ្ធកម្ពុជាថ្មី36នាក់…

(ភ្នំពេញ)៖ សិស្សានុសិស្សនៅក្នុងវិទ្យាល័យទឹកល្អក់ចំនួន 36នាក់ និង ស្រី 6នាក់នៅក្នុងវិទ្យាល័យទឹកល្អក់បានសច្ចា ប្រណិធានចូលជាសមាជិក សមាជិកាកាយរិទ្ធកម្ពុជា ដើម្បីចូលរួមបម្រើការងារមនុស្សធម៌នៅក្នុងសង្គម។ ពិធីសច្ចាប្រណិធាន និងបំពាក់កន្សែងជូនសមាជិក សមាជិកាកាយរិទ្ធកម្ពុជាថ្មីនេះ ត្រូវបានធ្វើឡើងកាលពីថ្ងៃទី៣០ខែមិនា ឆ្នាំ២០២២ ក្រោមអធិបតីភាពលោក ង៉ែត ចាន់សុខ ប្រធានការិយាល័យយុវជននៃមន្ទី អប់រំយុវជននិងកីឡា រាជធានីភ្នំពេញ និង លោក ឡុច ប៉ូលីន នាយកវិទ្យាល័យ ទឹកល្អក់ លោក សុខ សុធី លោក ណើប វ៉េត នាយករង នៃវិទ្យាល័យ ទឹកល្អក់ លោក មូល ពេជ្រ និល ជំនួយការប្រធានយុវជននៃវិទ្យាល័យទឹកល្អក់ រួមទាំងយុវជន កាយរិទ្ធ រៀមច្បង ផងដែរ។

ក្នុងពិធីនេះ លោក ង៉ែត ចាន់សុខ បានផ្តាំផ្ញើដល់សមាជិក សមាជិកា កាយរិទ្ធថ្មីទាំងអស់ ត្រូវខិតខំឲ្យបានជាដាច់ខាតនូវតួនាទី ភារកិច្ច ស្នូលសម្រាប់សាសនា ជាតិ ប្រជាជន និងសម្រាប់ខ្លួនឯង។

លោក ង៉ែត ចាន់សុខ បានផ្តាំផ្ញើដល់កាយរិទ្ធថ្មីទាំងអស់ ត្រូវខិតខំសិក្សាឲ្យបានពូកែ ដើម្បីក្លាយជាទំពាំង ដ៏មាន សក្តានុពលស្នងឬស្សី ដើម្បីចូលរួមអភិវវឌ្ឍន៍ប្រទេសជាតិឲ្យបានរីកចម្រើន ដូចបណ្តាប្រទេសលើពិភពលោក និងប្រទេសជាតិខាង និងជួយដល់ប្រជាពលរដ្ឋដទៃទៀត ឲ្យទទួលបានឱកាសចូលរួមការអភិវឌ្ឍផងដែរ។

លោក ង៉ែត ចាន់សុខ បានគូសបញ្ជាក់ថា កាយរិទ្ធត្រូវតែជាមនុស្ស ដែលប្រកបដោយសក្តានុពល ដោយចេះបង្ក ឱកាស និងក្តាបចាប់យកឱកាសសម្រាប់អភិវឌ្ឍខ្លួន ឲ្យក្លាយជាកោសិកាដ៏ល្អ របស់សង្គមជាតិ និងសង្គមគ្រួសារ របស់ខ្លួនផងដែរ។ ជាពិសេសត្រូវតែធ្វើជាកូនល្អ សិស្សល្អ និងមិត្តល្អ។

សូមបញ្ជាក់ថា អង្គការកាយរិទ្ធកម្ពុជា ជាចលនាអប់រំដោយស្ម័គ្រចិត្តរបស់កុមារ និង យុវជនមិនធ្វើនយោបាយ ដោយមិនគិតអំពីដើមកំណើតសញ្ជាតិ ហើយចលនាកាយរិទ្ធមានគោលបំណងចូលរួមចំណែក អភិវឌ្ឍកុមារ យុវជនឲ្យមានសក្ដានុពលពេញលេញខាងផ្លូវកាយ ផ្លូវចិត្ត ផ្លូវបញ្ញា ផ្លូវសង្គម និងឲ្យក្លាយជាពលរដ្ឋល្អមានការ ទទួលខុសត្រូវក្នុងសហគមន៍ជាតិ និង អន្តរជាតិ។ សមាជិកកាយរិទ្ធម្នាក់ៗ មានភារកិច្ច ចំពោះសាសនា និង ប្រទេសជាតិ ភារកិច្ចសង្គ្រោះមនុស្សផងទាំងពួង និង ភារកិច្ចចំពោះខ្លួនឯ៕