នៅឋាន​ព្រះ​ចន្ទ​ អាចដាំ​រុក្ខជាតិ​លើដី​បាន​ជា​លើកដំបូង​

Soeun 13 May 2022 ៖     ​ព្រឹត្តិការណ៍​ដ៏​សំខាន់​មួយ​នេះ​ក្នុង​ការរុករក​លើ​ព្រះ​ចន្ទ​និង​ទី​អវកាស​គឺជា​ជំហាន​ដំបូង​ឆ្ពោះទៅរក​ការដាំ​រុក្ខជាតិ​នៅ​ថ្ងៃ​ណាមួយ​សម្រាប់​អាហារ​និង​អុកស៊ីសែន​នៅលើ​ឋាន​ព្រះ​ចន្ទ​ឬ​អំឡុងពេល​បេស​​ក​កម្ម​ក្នុង​លំហ​។​

​នៅក្នុង​ការសិក្សា​ថ្មី អ្នក​ស្រាវជ្រាវ​របស់​សាកលវិទ្យាល័យ​ផ្លរីដា​បានបង្ហាញ​ថា រុក្ខជាតិ Arabidopsis (​ពូជ​របស់​ស្ពៃ​ខ្មៅ​)​អាច​ដុះ​ពន្លក​និង​លូតលាស់​ដោយ​ជោគជ័យ​នៅក្នុង​ដី​ដែល​ប្រមូលបាន​ពី​បេស​​ក​កម្ម​យាន Apollo 11, 12 និង 17 ។​

​ការសិក្សា​របស់​ពួកគេ​ក៏​បាន​ស៊ើបអង្កេត​ពី​របៀប​ដែល​រុក្ខជាតិ​ឆ្លើយតប​បែប​ជីវសាស្ត្រ​ទៅ​នឹង​ដី​របស់​ព្រះ​ចន្ទ​ផងដែរ ដែល​គេ​ស្គាល់​ថា រជ្ជៈ​សីលា ដែល​ខុស​ពី​ដី​នៅ​លើ​ផែនដី​។​

​ការស្រាវជ្រាវ​នេះ​កើត​ឡើង​នៅ​ពេល​ដែល​កម្មវិធី​យាន Artemis គ្រោង​នឹង​បញ្ជូន​មនុស្ស​ទៅ​ឋាន​ព្រះ​ចន្ទ​។​

​លោក រ៉ប់ ហ្វើល (Rob Ferl) ជា​អ្នកនិពន្ធ​ការសិក្សា​និង​ជា​សាស្ត្រាចារ្យ​ផ្នែក​វិទ្យាសាស្ត្រ​សាកវប្បកម្ម​នៅ​វិទ្យាស្ថាន​អាហារ​និង​វិទ្យាសាស្ត្រ​កសិកម្ម UF (UF/IFAS) បាន​និយាយថា​”​ការបង្ហាញ​​ថា​រុក្ខជាតិ​នឹង​ដុះ​នៅលើ​ដី​ព្រះ​ចន្ទ​ពិតជា​ជំហាន​ដ៏​ធំ​មួយ​ក្នុងទិសដៅ​ដើម្បី​ពួក​យើង​អាច​ធ្វើ​អាណានិគម​លើ​ព្រះ​ចន្ទ​”​។​

​លោក​បាន​បន្ថែមថា វា​ក៏​សំខាន់​ផង​ដែរ​ក្នុង​ការបង្ហាញ​ថា ដី​ព្រះ​ចន្ទ​មិនមាន​គ្រោះថ្នាក់​ដល់​ជីវិត​លើ​ផែនដី​ទេ ហើយ​ក៏​បង្ហាញ​ដែរ​ថា ជីវិត​នៅលើ​ផែនដី​អាចបង្កើត​ខ្លួន​ឯង​នៅលើ​ព្រះ​ចន្ទ​៕

                                                               រុក្ខជាតិ Arabidopsis អាច​ដាំ​ដុះ​លើ​ដី​ព្រះ​ចន្ទ