រដ្ឋមន្ត្រី​ក្រសួង​កសិកម្មថៃ ជំរុញឱ្យកសិករដាំទុរេនឱ្យបានច្រើន ដោយមិនបាច់ភ័យព្រួយរឿងលក់មិនចេញទេ

អន្តរជាតិ៖ រដ្ឋមន្រ្តីក្រសួងកសិកម្ម និងសហករណ៍ថៃ លោក Chalermchai Sri-on បានលើកទឹកចិត្តកសិករឱ្យបង្កើនការដាំដុះទុរេន ដើម្បីបំពេញតម្រូវការដែលកំពុងកើនឡើងនៅលើទីផ្សារពិភពលោក។ លោក Chalermchai បាននិយាយក្នុងអំឡុងកិច្ចពិភាក្សាលើប្រធានបទ “ផ្លែឈើថៃសម្រាប់ពិភពលោក” ថា៖ ក្រសួងកសិកម្មកំពុងផ្សព្វផ្សាយទុរេនយ៉ាងពេញទំហឹង ចាប់ពីតាំងការដាំដុះរហូតដល់នៅលើទីផ្សារ។

ជាមួយគ្នានេះដែរ លោកបាន​ណែនាំឱ្យអ្នកដាំទុរេន ត្រូវធ្វើយ៉ាងណា គឺធានានូវគុណភាពនៃផលិតផលរបស់ពួកគេ និងធ្វើឱ្យទុរេនថៃមានរសជាតិឆ្ងាញ់បំផុតនៅក្នុងពិភពលោក ដូច្នេះដាំច្រើនប៉ុណ្ណាក៏មិនលើសការផ្គត់ផ្គង់ដែរ ជាពិសេសនៅក្នុងរយៈពេល ១០ឆ្នាំខាងមុខទៀត។

គួរបញ្ជាក់ផងដែរថា ទីផ្សារ​នាំ​ចេញ​ផ្លែ​ឈើ​របស់​ថៃ​មាន​តម្លៃ​ប្រហែល ២០០ ពាន់​លាន​បាត ទៅ ៤០០ ពាន់​លាន​បាត ដោយ​ទុរេន​ជាផ្លែឈើដែលរក​ចំណូល​បាន​ច្រើន​។ ជាមួយគ្នានេះការនាំចេញទុរេនមានតម្លៃ ១០៩ពាន់លានបាត (ប្រមាណ ៣.១៦ពាន់លានដុល្លារ) លើសពីតម្លៃនាំចេញអង្ករប្រចាំឆ្នាំ ដែលមិនធ្លាប់ក្នុងរយៈពេល ៣សវត្សរ៍កន្លងមកនេះ​ ៕