ប្រេសិត​ពិសេស​អាស៊ាន សំដែង​ការ​ខក​ចិត្ត ខណៈ​វិបត្តិនយោបាយ​នៅភូមា​បន្តអូស​បន្លាយ

Soeun 28 May 2022ភ្នំពេញ៖       ប្រេសិតពិសេសអាស៊ាន ហាក់សំដែងការខកចិត្ត              ​       ចំពោះវិបត្តិនយោបាយដែលបន្តអូសបន្លាយនៅប្រទេសភូមា ខណៈដែលវិបត្តិនេះ ត្រូវបានគេមើលឃើញថាមានលក្ខណៈស្មុគស្មាញ និងចាក់ស្រែះកាន់តែជ្រៅទៅ។

ការលើកឡើងយ៉ាងដូច្នេះ គឺដោយលោក ប្រាក់ សុខន ខណៈពេលដែល លោកកំពុង

ទន្ទឹងរង់ចាំ ដំណើរ ទស្សនកិច្ចលើក ទីពីរទៅ កាន់ ប្រទេស មីយ៉ាន់ម៉ានៅពេលដ៏ខ្លីខាងមុខនេះ។

«៥ខែហើយ             គិតចាប់តាំងពីការជូនព័ត៌មានលើកដំបូងរបស់ខ្ញុំដល់ក្រុមប្រឹក្សាសន្តិសុខអង្គការសហប្រជាជាតិស្តីពីបញ្ហាមីយ៉ាន់ម៉ាកាលពីខែមករាដើមឆ្នាំនេះ។ ជាក់ស្តែង ប្រទេសមីយ៉ាន់ម៉ានៅតែបន្តប្រឈមមុខនឹងបញ្ហាស្មុគស្មាញជាច្រើន ដូចជាវិបត្តិនយោបាយ និងសេដ្ឋកិច្ច ជំងឺរាតត្បាតកូវីដ-១៩ និងវិបត្តិមនុស្សធម៌ដ៏ធ្ងន់ធ្ងរ»។ នេះគឺជាការកត់សំគាល់របស់លោក ប្រាក់ សុខុន រដ្ឋមន្ត្រីការបរទេស​កម្ពុជា និងជាប្រេសិតពិសេសរបស់អាស៊ាន​ដែលកម្ពុជាជាប្រធាន។

យ៉ាងណាក្តី បើតាមប្រមុខការទូតកម្ពុជារូបនេះ គឺមិនទាន់អស់សង្ឃឹមនោះទេ ដរាបណាភាគីពាក់ព័ន្ធ រួមទាំងអាស៊ាន និងសហគមន៍អន្តរជាតិ បន្តប្រាស្រ័យទាក់ទងជាមួយមីយ៉ាន់ម៉ាប្រកបដោយការស្ថាបនា ផ្ទុយពីនយោបាយឯកោនិយម។ ក៏ប៉ុន្តែកម្ពុជាទទួលស្គាល់ថាវិបត្តិនៅមីយ៉ាន់ម៉ាគឺមានលក្ខណៈកាន់តែចាក់ស្រែះជ្រៅទៅ។

សម្រាប់ប្រេសិតពិសេសរូបនេះ ខណៈពេលដែលកម្ពុជាកំពុងប្រឹងប្រែងអស់ពីសមត្ថភាពក្នុងនាមជាប្រធានអាស៊ាន គឺគេនៅតែមានសង្ឃឹមថាកិច្ចប្រឹងប្រែងនោះនឹងចូលរួមចំណែកកសាងមូលដ្ឋានគ្រឹះដ៏រឹងមាំមួយដើម្បីស្វែងរកសន្តិភាព ស្ថិរភាព និងវិបុលភាពសម្រាប់ប្រទេសមីយ៉ាន់ម៉ាទាំងមូល។

លោក ប្រាក់ សុខុន បានផ្តល់​ក្តីរំពឹងចំនួន៥ចំណុច ខណៈពេលដែលលោកទន្ទឹងរង់ចាំដំណើរទស្សនកិច្ចលើកទីពីរទៅកាន់ប្រទេសមីយ៉ាន់ម៉ានៅពេលដ៏ខ្លីខាងមុខនេះ គឺការបញ្ឈប់អំពើហិង្សា ការចូលរួមប្រាស្រ័យទាក់ទងគ្នាក្នុងន័យស្ថាបនា យុទ្ធនាការចាក់វ៉ាក់សាំងកូវីដ-១៩ ការផ្តល់ជំនួយមនុស្សធម៌  និង ជាពិសេស សុទិដ្ឋិនិយម។

កាលពីខែកុម្ភៈ ប្រមុខ​រដ្ឋាភិបាលកម្ពុជា ​បានថ្លែងថា លោក​នឹង​មិនឈឺក្បាល​ចំពោះ​ជម្លោះនយោបាយ​នៅភូមាតទៅទៀតឡើយ ដោយសារតែ​នៅ​សល់​ពេលប៉ុន្មានខែ​ទៀត​ កម្ពុជា​ត្រូវផុតអាណត្តិជាប្រធានអាស៊ានហើយ បន្ទាប់ពីលោក​បានព្យាយាម​អស់ល​ទ្ធភាព ​ដើម្បី​ដោះស្រាយពីវិបត្តិនៅភូមាដែលអូសបន្លាយ​រាប់​សិបឆ្នាំមកនេះ៕