ព័ត៌មានជាតិ
ប្រាសាទកោះកេរ ត្រូវបានក្រសួងកំពុងរៀបចំឯកសារដាក់ជាសម្បត្តិបេតិកភណ្ឌពិភពលោក
ភ្នំពេញ៖ រដ្ឋមន្ត្រីក្រសួងវប្បធម៌ និងវិចិត្រសិល្បៈលោកស្រី ភឿង សកុណា បានឱ្យដឹងពីថ្ងៃទី ២២ខែធ្នូថា ក្រសួង បានសហការជាមួយអ្នកជំនាញជាតិ-អន្តរជាតិកំពុងរៀបចំឯកសារដាក់ជូនគណៈកម្មាធិការបេតិកភណ្ឌពិភពលោកពិនិត្យ និងសម្រេចឆាប់ៗខាងមុខនេះ ដើម្បីស្នើសុំដាក់បញ្ចូល«ប្រាសាទកោះកេរ»ជាសម្បត្តិបេតិកភណ្ឌពិភពលោក។
លោកស្រី ភឿង សកុណា បានថ្លែងក្នុងកិច្ចប្រជុំពេញអង្គលើកទី៦ នៃគណៈកម្មាធិការសម្របសម្រួលអន្តរជាតិសម្រាប់ការអភិរក្ស និងការលើកតម្លៃព្រះវិហារ (ICC-Preah Vihear) នៅថ្ងៃទី២២ ខែធ្នូថា ក្រសួងវប្បធម៌ និងវិចិត្រសិល្បៈ កំពុងសហការជាមួយអ្នកជំនាញការជាតិ និងអន្តរជាតិ ដើម្បីរៀបចំឯកសារដាក់បញ្ចូលប្រាសាទកោះកេរជាសម្បត្តិបេតិកភណ្ឌពិភពលោក ហើយនឹងដាក់ជូនគណៈកម្មាធិការបេតិកភណ្ឌពិភពលោកពិនិត្យ និងសម្រេចក្នុងពេលឆាប់ៗខាងមុខនេះ។
លោកស្រីបន្តថា កាលពីឆ្នាំ២០១៨ កម្ពុជា បានចុះសិក្សាស្រាវជ្រាវនៅតំបន់ប្រាសាទកោះកេរ ខេត្តព្រះវិហារ និងប្រាសាទបន្ទាយឆ្មារ ខេត្តបន្ទាយមានជ័យ ដើម្បីស្នើដាក់ប្រាសាទខ្មែរទាំងពីរនេះទៅក្នុងបញ្ជីសម្បត្តិបេតិកភណ្ឌពិភពលោក បន្ទាប់ពីប្រាសាទអង្គរវត្តបានចុះបញ្ជីជាសម្បត្តិបេតិកភណ្ឌពិភពលោកនៅឆ្នាំ១៩៩២ ប្រាសាទព្រះវិហារនៅឆ្នាំ២០០៨ និងតំបន់ប្រាសាទសំបូរព្រៃគុកនៅឆ្នាំ២០១៧។
ទីតាំងប្រជុំប្រាសាទកោះកេរនេះ គឺជាអតីតរាជធានី «ឆោកគគ៌្យរ» របស់ព្រះបាទជ័យវរ្ម័នទី៤ ដែលត្រូវបានកសាងឡើងក្នុងសតវត្សទី១០ (៩២៨-៩៤២)។ ព្រះអង្គបានផ្លាស់ប្តូររាជធានីពីក្រុងយសោធរបុរៈ (ក្រុងអង្គរ) ទៅកាន់តំបន់កោះកេរនេះក្រោយពេលដណ្ដើមរាជបល្ល័ង្កពីក្មួយរបស់ព្រះអង្គ គឺព្រះបាទយសោវរ្ម័នទី២ ដែលសោយរាជ្យនៅក្រុងអង្គរ។ ប្រាសាទនេះកសាងឡើងតាមរចនាប័ទ្មកោះកេរ ដែលមានរាងស្រដៀងនឹងពីរ៉ាមីត។
គួររំឭកថា ប្រាសាទកោះកេរមានទីតាំងស្ថិតនៅក្នុងភូមិស្រយ៉ង់ជើង ឃុំស្រយ៉ង់ ស្រុកគូលេន ខេត្តព្រះវិហារ មានចម្ងាយប្រមាណ ៧២ គីឡូម៉ែត្រពីទីរួមខេត្តសៀមរាប បើធ្វើដំណើរតាមផ្លូវលេខ ២១១ ហើយបើធ្វើដំណើរពីទីរួមខេត្តព្រះវិហារមានចម្ងាយ ៤៩ គីឡូម៉ែត្រប៉ុណ្ណោះ៕
សម្តេចតេជោ ហ៊ុន សែន លើកឡើងថា៖ ឆ្នាំ២០២២កន្លងទៅ ថ្ងៃនេះខ្ញុំចេញដំណើរទៅ អង្គការសហប្រជាជាតិ ថ្ងៃនេះនាយករដ្ឋមន្ត្រីថ្មីចេញដំណើរទៅម្តង
ឆ្នាំនេះកម្ពស់ទឹកទន្លេទាបជាងឆ្នាំកន្លងទៅ ប៉ុន្តែបានផ្តល់នូវកត្តាវិជ្ជាមានយ៉ាងច្រើនសម្រាប់វិស័យកសិកម្ម
