រដ្ឋាភិបាល​​ចំណាយថវិកាជិត៣៦ម៉ឺនដុល្លារលើម្ចាស់ជ័យលាភីកីឡាវ៉ូវីណាម ប៉េតង់ និងតុងហ្គីលម៉ូដូ

ក្នុងនោះថវិកាទាំងនេះ រដ្ឋបានបែងចែកថវិកាចំនួន១,១២១លានរៀល(ជាង២៨ម៉ឹនដុល្លារ) សម្រាប់ចំណាយលើម្ចាស់ជ័យលាភីលើប្រភេទកីឡាវ៉ូវីណាម ដែលដណ្តើមបានមេដាយមាស៩ ប្រាក់១០ និងសំរឹទ្ធ៩ ពីការធ្វើជាម្ចាស់ផ្ទះការប្រកួតជើងឯកពិភពលោកចន្លោះពីថ្ងៃទី១៦-២២ ខែធ្នូ ឆ្នាំ២០១៩។ ការប្រកួតជើងឯកពិភពលោក ដែលកម្ពុជាធ្វើម្ចាស់ជាលើកដំបូងនេះ មានកីឡាករកីឡាការិនីចំនួន២៤៧រូបមកពី២៤ប្រទេសចូលរួម ខណៈកម្ពុជាមានកីឡាករកីឡាការិនីចំនួន២៤រូប។

ចំណែកថវិកា២៥៨លានរៀល(ប្រមាណ៦៤,៥០០ដុល្លារ)ត្រូវបានរដ្ឋចំណាយលើម្ចាស់ជ័យលាភីក្នុងការប្រកួតកីឡាប៉េតង់ជ្រើសជើងឯកអាស៊ីអាគ្នេយ៍នៅប្រទេសវៀតណាម ចាប់ពីថ្ងៃទី១៨-២២ ខែធ្នូ ឆ្នាំ២០១៩។ កាលនោះកម្ពុជាបានបញ្ជូនកីឡាករកីឡាការិនីចំនួន១៤រូបឲ្យចូលរួម ដោយដណ្តើមបានមេដាយមាស១០គ្រឿង ប្រាក់៣គ្រឿង និងសំរឹទ្ធ១គ្រឿង។

ដោយឡែក ថវិកាចំនួន៥២លានរៀល(ប្រមាណ១៣,០០០ដុល្លារ)ត្រូវបានចំណាយលើម្ចាស់ជ័យលាភីក្នុងការប្រកួតកីឡាតុងហ្គីលម៉ូដូជ្រើសជើសជើងឯកពិភពលោកនៅប្រទេសកូរ៉េខាងត្បូង ចាប់ពីថ្ងៃទី២៣ ខែសីហា ដល់ថ្ងៃទី២ ខែកញ្ញា ឆ្នាំ២០១៩។ កាលណោះ កម្ពុជា បានបញ្ជូនកីឡាករកីឡាការិនីចំនួន៥រូបឲ្យចូលរួម ដោយដណ្តើមបានមេដាយសំរឹទ្ធចំនួន៣៕