ព័ត៌មានទាន់ហេតុការណ៍

ប្រព័ន្ធរ៉ុក្កែតHIMARSបួនឈុតបន្ថែមទៀត អាម៉េរិកនឹងបញ្ជូនទៅកាន់អ៊ុយក្រែន

Soeun 21 July 2022វ៉ាស៊ីនតោន (CNA)៖ កាលពីថ្ងៃពុធទី២០ខែកក្កដា ឆ្នាំ២០២២លោក ឡយ អូស្ទីន រដ្ឋមន្ត្រីការពារជាតិអាម៉េរិកថា សហរដ្ឋអាម៉េរិកនឹងបញ្ជូនប្រព័ន្ធរ៉ុក្កែតចល័តខ្ពស់ធុនហាយម៉ាស(HIMARS) ចំនួនបួនឈុតទៀតទៅកាន់អ៊ុយក្រែន នេះជាការជំនួយផ្នែកយោធាមួយកញ្ចប់ថ្មីដើម្បីជួយអោយអ៊ុយក្រែនអាចការពារខ្លួនទល់នឹងកងកម្លាំងរុស្ស៊ី។

លោក សឺហ្គេ សយហ្គូ រដ្ឋមន្ត្រីការពារជាតិរុស្ស៊ី មុននេះបានបញ្ជាអោយពួកឧត្តមសេនីយ៍ផ្តោតលើការបំផ្លាញចោលកាំជ្រួចចម្ងាយឆ្ងាយនិងកាំភ្លើងធំរបស់អ៊ុយក្រែន បន្ទាប់ពីសព្វាវុធដែលផ្តល់ឲ្យពីលោកខាងលិចត្រូវបានកងកម្លាំងអ៊ុយក្រែនយកទៅវាយប្រហារខ្សែត្រៀមជួរមុខផ្គត់ផ្គង់របស់រុស្ស៊ី។

គួរបញ្ជាក់ថា៖រហូតមកដល់ពេលនេះជិតប្រាំខែបន្ទាប់ពីប្រធានាធិបតីរុស្ស៊ីលោកវ្ល៉ាឌីមៀ ពូទីន បញ្ជាអោយបើកប្រតិបត្តិការពិសេសមួយចូលអ៊ុយក្រែន កងកម្លាំងរុស្ស៊ីផ្តោតការវាយប្រហារលើតំបន់ដុនបាសនៅអ៊ុយក្រែនខាងកើតហើយបានកាន់កាប់ទឹកដីអ៊ុយក្រែនប្រមាណមួយភាគប្រាំ។

លោកអូស្ទីន បាននិយាយនៅក្នុងកិច្ចប្រជុំមួយជាមួយសម្ពន្ធមិត្តស្តីអំពីបញ្ហាអ៊ុយក្រែនថា យើងនឹងរក្សាស្វែងរកផ្លូវប្រកបដោយការច្នៃប្រឌិតដើម្បីបន្តគាំទ្រយូរអង្វែងសំរាប់បុរសនិងស្ត្រីដ៏ក្លាហានរបស់អ៊ុយក្រែន ហើយនឹងបន្ថែមជំនួយរបស់យើងដើម្បីធានាថា អ៊ុយក្រែនមានបច្ចេកវិទ្យា គ្រាប់រំសេវនិងកម្លាំងបាញ់ត្រង់សំរាប់ការពារខ្លួន។

សូមបញ្ជាក់ថា៖ លោកខាងលិចបានផ្តល់អោយអ៊ុយក្រែននូវកាំភ្លើងធំចម្ងាយឆ្ងាយនិងប្រព័ន្ធរ៉ុក្កែតដើម្បីតតបទៅកាន់កងកម្លាំងរុស្ស៊ី ដែលមានឧត្តមភាពខាងកាំភ្លើងធំនិងគ្រាប់រំសេវច្រើនជាងខ្លួន។

អ៊ុយក្រែនថាកងកម្លាំងរបស់ខ្លួនបានវាយប្រហារដោយជោគជ័យលើមណ្ឌលភស្តុភានិងគ្រាប់រំសេវចំនួន៣០កន្លែងរបស់រុស្ស៊ី ដោយប្រើប្រព័ន្ធរ៉ុក្កែតដែលលោកខាងលិចទើបផ្តល់អោយ។

លោកឧត្តមសេនីយ៍ ម៉ាក មីលលី(Mark Milley)នាយសេនាធិការកងទ័ពចំរុះអាម៉េរិកបានធ្វើសន្និសីទកាសែតមួយក្រោយពីកិច្ចប្រជុំ បានលើកថា អ៊ុយក្រែនបានប្រើប្រព័ន្ធរ៉ុក្កែតហាយម៉ាសដើម្បីវាយលើទីតាំងបញ្ជាការនិងបណ្តាញឡូជីស្ទិចរបស់រុស្ស៊ី ព្រមទាំងទីតាំងការពារដែនអាកាសរុស្ស៊ីនៅអ៊ុយក្រែនផង។

ទាហានអ៊ុយក្រែនប្រមាណ២០០នាក់ត្រូវបានបណ្តុះបណ្តាលអោយចេះប្រើប្រព័ន្ធរ៉ុក្កែតHIMARSនិងមិនមានអាវុធប្រភេទនេះណាមួយត្រូវបំផ្លាញដោយកងកម្លាំងរុស្ស៊ីឡើយ នេះបើតាមការបញ្ជាក់ពីលោកមីលលី។

លោកបានបន្ថែមទៀតថា តំបន់ដុនបាសនៅមិនទាន់ធ្លាក់ក្នុងដៃរុស្ស៊ីនៅឡើយទេនិងបានពណ៌នាវាថានេះគឺជា«សង្គ្រាមសង្កៀតធ្មេញដាក់គ្នាមួយតែប៉ុណ្ណោះ៕