មិនទាន់រួចខ្លួនទេ​ កម្ពុជានឹងបនុ្ត ​ ​ត្រជាក់ខ្លាំង មួយ​សប្ដាហ៍​ទៀត

​ភ្នំពេញ​៖ មិនទាន់រួចខ្លួនទេ​ កម្ពុជានឹងបនុ្ត ​ ​ត្រជាក់ខ្លាំង មួយ​សប្ដាហ៍​ទៀត ចាប់ពី​ថ្ងៃទី​២០ ដល់​២៦ មករា​។ នេះ​បើតាម​ការ​ព្យាករ​របស់​ក្រសួង​ធនធានទឹក និង​ឧ​ត្តុ​និយម ។​

បើតាមសេចក្កីប្រកាសព័ត៌មានរបស់ ក្រសួង​ធនធានទឹកនិងឧត្តុនិយម បាន​បញ្ជាក់ថា មូលហេតុ​ដែល​នាំ​កម្ពុជា​ចុះ​ត្រជាក់ ដោយសារ​ឥទ្ធិពល​ជ្រលង​សម្ពាធ​ខ្ពស់ និង​ខ្យល់មូសុង​ឦសាន​ចុះខ្សោយ ។ បើតាម​ក្រសួង​ធនធានទឹក បណ្ដា​ខេត្ត​នៅ​តំបន់​វាលទំនាប​កណ្ដាល សីតុណ្ហភាព​អប្បបរមា​ពី ១៧-២២​អង្សា​សេ និង​សីតុណ្ហភាព​អតិបរមា​ពី ២៧-៣០​អង្សា​សេ ។ ចំណែក​បណ្ដា​ខេត្ត ជាប់​ជួរ​ភ្នំ​ដងរែក និង​ខ្ពង់រាប​ឦសាន សីតុណ្ហភាព​អប្បបរមា​ពី ១៣-១៨​អង្ស​សេ និង​សីតុណ្ហភាព​អតិបរមា​ពី ២៧-២៩​អង្សា​សេ​។ កម្រិត​អាកាសធាតុ​នៅ​ភូមិសាស្ត្រ​ទាំងនេះ គឺ​ចាប់ពី​ថ្ងៃទី​២០-២២ មករា​។​

​ដោយឡែក​តំបន់​ទំនាប​ភាគខាងត្បូង​វិញ នឹងមាន​សីតុណ្ហភាព​អប្បបរមា​ពី ២០-២៥​អង្សា​សេ និង​សីតុណ្ហភាព​អតិបរមា​ពី ៣០-៣៤​អង្សា​សេ ។ រីឯ​តំបន់​ខ្ពង់រាប​ភាគ​ខាងកើត មាន​សីតុណ្ហភាព​អប្បបរមា​ពី ១៩-២១​អង្សា​សេ និង​សីតុណ្ហភាព​អតិបរមា​ពី ២៨-៣២​អង្សា​សេ​។ តំបន់​ទាំងនេះ អាច​នឹងមាន​ភ្លៀង​ធ្លាក់​ពី​កម្រិត​ខ្សោយ ទៅ​មធ្យម​ទៀតផង ចាប់ពី​ថ្ងៃទី​២៣ ដល់​២៦ មករា​។​

​សម្រាប់​តំបន់​មាត់សមុទ្រ មាន​សីតុណ្ហភាព​អប្បបរមា​ពី ២៣-២៥​អង្សា​សេ និង​សីតុណ្ហភាព​អតិបរមា​ពី ២៩-៣១​អង្សា​សេ ហើយ​អាចមាន​ភ្លៀង​ផ្គរ​រន្ទះ ពី​ខ្សោយ​ទៅ​បង្គួរ​ផងដែរ ក្នុង​រយៈពេល​ដូចគ្នានេះ​។ នេះ​បើតាម​ការ​ព្យាករ​របស់​ក្រសួង​ធនធានទឹក ៕