មន្រ្តីជំនិតលោក ពូទីន ថាមិនបញ្ឈប់សង្រ្គាមនៅអ៊ុយក្រែនឡើយ យ៉ាងណាអ៊ុយក្រែនទម្លាក់ចោលក្តីសង្ឃឹមចូល NATO ក៏ដោយ

(មូស្គូ)៖ មន្រ្តីជំនិតបំផុតម្នាក់របស់ប្រធានាធិបតីរុស្ស៉ី លោក វ៉្លាឌីមៀ ពូទីន កាលពីថ្ងៃសុក្រសប្តាហ៍នេះ បាននិយាយថា ទីក្រុងមូស្គូនឹងមិនបញ្ឈប់ការធ្វើសង្រ្គាមនៅអ៊ុយក្រែនឡើយ បើទោះបីជា ទីក្រុងកៀវ ប្រកាសបោះបង់ចោលជាផ្លូវការ នូវចេតនាចង់ចូលរួមក្នុងអង្គការណាតូ (NATO) ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី២៧ ខែសីហា ឆ្នាំ២០២២។

បទសម្ភាសន៍មួយ ជាមួយស្ថានីយទូរទស្សន៍បារាំង LCI លោក ឌីមីទ្រី មេដវ៉េដេវ (Dmitry Medvedev) ដែលជាអតីតប្រធានាធិបតី ហើយបច្ចុប្បន្នជា អនុប្រធានក្រុមប្រឹក្សាសន្តិសុខជាតិរបស់ប្រទេសរុស្ស៉ី បានលើកឡើងថា ការប្រកាសបោះបង់ចោលក្តីសង្ឃឹមចូលរួមក្នុង បក្សសម្ព័ន្ធយោធាអាត្លង់តិចខាងជើង (NATO) គឺជារឿងចាំបាច់មួយនាពេលឥឡូវនេះ ប៉ុន្តែវាមិនគ្រប់គ្រាន់ដើម្បីឆ្ពោះទៅរកសន្តិភាពនោះទេ។

គួរបញ្ជាក់ថា ៖លោក មេដវ៉េដេវ បានលើកឡើងថា រុស្ស៉ីនឹងបន្តប្រតិបត្តិការយោធាពិសេសរបស់ខ្លួននៅអ៊ុយក្រែន រហូតសម្រេចបានគោលដៅទាំងអស់។ កន្លងមកនេះ លោក ពូទីន ផ្ទាល់ ធ្លាប់និយាយថា ការធ្វើសង្រ្គាមនៅអ៊ុយក្រែន គឺលោកចង់កម្ចាត់គំនិតណាហ្ស៉ីនិយម នៅក្នុងប្រទេសនេះ។ រីឯទីក្រុងកៀវនិងក្រុមប្រទេសលោកខាងលិចវិញ បាននិយាយថា វាគឺជាលេសដែលគ្មានមូលដ្ឋានត្រឹមត្រូវ សម្រាប់ការបំផ្ទុះសង្រ្គាមរំលោភទឹកដីនៅអ៊ុយក្រែន។

សូមបញ្ជាក់ថា៖ ចាប់តាំងតែពីការឈ្លានពានរបស់រុស្ស៉ីបានចាប់ផ្តើមមក ទីក្រុងកៀវនិងទីក្រុងមូស្គូ បានបើកកិច្ចចរចាប៉ុន្មានលើកជាមួយគ្នា ក៏ប៉ុន្តែកិច្ចចរចាទាំងនោះ មិនសម្រេចបានភាពរីកចម្រើនអ្វីឡើយ ស្តីពីការឆ្ពោះទៅរកសន្តិភាព ហើយមកទល់នឹងពេលនេះទៀតសោត មានលទ្ធភាពតិចតួចប៉ុណ្ណោះ ដែលថាកិច្ចសន្ទនានឹងបន្តឡើងវិញរវាងភាគីទាំងពីរ៕