សម្តេចតេជោ អញ្ជើញជាអធិបតីក្នុងពិធីបើកការដ្ឋានពង្រីក និងលើកកំពស់គុណភាពផ្លូវជាតិលេខ៧ ចាប់ពីរង្វង់មូលស្គន់ ដល់ខេត្តកំពង់ចាម

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញជាអធិបតីក្នុងពិធីបើកការដ្ឋានពង្រីក និងលើកកំពស់គុណភាពផ្លូវជាតិលេខ៧ ចាប់ពីរង្វង់មូលស្គន់ ក្នុងស្រុកជើងព្រៃ ដល់ទីរួមខេត្តកំពង់ចាម នៅថ្ងៃទី៩ ខែមករា ឆ្នាំ២០២៣។ ឯកអគ្គរដ្ឋទូតចិនប្រចាំកម្ពុជា ឯកឧត្តម Wang Wentian ក៏នៅនឹងដៃផងដែរ។

កំណាត់ផ្លូវជាតិលេខ៧នេះត្រូវបានជួសជុល និងស្ថាបនាឡើងវិញនៅឆ្នាំ១៩៩៩ ជាផ្លូវបេតុង (AC) ដែលមានទទឹង ៧ម៉ែត្រ។នៅពេលនោះ កំណាត់ផ្លូវរួមជាមួយនឹងស្ពានមិត្តភាពកម្ពុជា-ជប៉ុន-ស្ពានគីហ្សូណា ត្រូវបាន សាងសង់ដោយជំនួយឥតសំណងពីរដ្ឋាភិបាលជប៉ុន។

ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល មានប្រសាសន៍ថា គម្រោងពង្រីក និងលើកកំពស់គុណភាពផ្លូវជាតិលេខ៧ មានប្រវែងសរុបជាង ៤៥គីឡូម៉ែត្រ ចាប់ពីរង្វង់មូលស្គន់ ក្រុងជើងព្រៃ ដល់រង្វង់មូល ស្ពានគីហ្សូណា ក្រុងកំពង់ចាម។ ដោយ ទទឹង ផ្លូវ បាន ពង្រីក ពី ២ គន្លង ទៅ ៤ គន្លង ដែល គន្លង នីមួយៗ មាន បណ្តោយ ៣,៧៥ ម៉ែត្រ និង បន្ទះ មធ្យម ១,៥ ម៉ែត្រ ។

ឯកឧត្តមទេសរដ្ឋមន្ត្រី ស៊ុន ចាន់ថុល បានបន្តទៀតថា គម្រោងនេះនឹងត្រូវអនុវត្តដោយសាជីវកម្មស្ពាន និងផ្លូវរបស់ប្រទេសចិន (CRBC) និងត្រួតពិនិត្យបច្ចេកទេសដោយក្រុមហ៊ុនប្រឹក្សាបច្ចេកទេសក្វាងចូវ វ៉ាន់អាន ដោយរយៈពេលសាងសង់ ៤០ខែ នឹងត្រូវបញ្ចប់នៅឆ្នាំ២០២៦។តម្លៃគម្រោង កម្ចីសម្បទានរបស់រដ្ឋាភិបាលចិនសរុបជាង ១១៧ លានដុល្លារអាមេរិក រួមជាមួយនឹងការរួមចំណែករបស់រាជរដ្ឋាភិបាលកម្ពុជា ដើម្បីរ៉ាប់រងការចំណាយលើការដោះមីន ការបោសសម្អាតយុទ្ធភណ្ឌមិនទាន់ផ្ទុះ និងពន្ធផ្សេងៗទៀត។

រដ្ឋមន្ត្រីក្រសួងសាធារណការ និងដឹកជញ្ជូន បានបន្ថែមថា កំណាត់ផ្លូវជាតិលេខ៧នេះ ជាផ្លូវដ៏សំខាន់ និងជាសរសៃឈាមសេដ្ឋកិច្ចដ៏មានសក្តានុពល តភ្ជាប់បណ្តាញផ្លូវថ្នល់រវាងរាជធានី-ខេត្ត។