ព័ត៌មានជាតិ

ប្រកាសចូលកាន់មុខតំណែង និងផ្ទេរភារកិច្ច អភិបាលស្រុកបន្ទាយស្រី និងស្រុកអង្គរធំ ខេត្តសៀមរាប

(សៀមរាប)៖ លោក រិន ឡូត អភិបាលរងស្រុកក្រឡាញ់ ឡើងកាន់ដំណែងជាអភិបាលស្រុកបន្ទាយស្រី ជំនួសលោក ឃឹម ហ្វីណង់ ដែលត្រូវបានតែងតាំងជាអភិបាលរងខេត្តសៀមរាប។ ចំណែកលោក ពៅ ប៊ុនធឿន អភិបាលស្រុកជីក្រែង មកជាអភិបាលស្រុកអង្គរធំ ជំនួសលោក ឡុង រដ្ឋារក្ស ដែលត្រូវផ្ទេរទៅធ្វើការនៅរដ្ឋបាលខេត្តសៀមរាប ។ក្នុងពិធីប្រកាសតែងតាំងការឡើងកាន់ដំណែងជាផ្លូវការ នាថ្ងៃទី៩ មករា អភិបាលខេត្តសៀមរាប ឯកឧត្តម ទៀ សីហា បានធ្វើការកោតសរសើរ និងវាយតម្លៃខ្ពស់ផងដែរ ចំពោះថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងស្រុកបន្ទាយស្រី និងស្រុកអង្គរធំ ដែលបានរួមសាមគ្គីគ្នា ក្នុងការកសាងអភិវឌ្ឍន៍ស្រុក ឲ្យមានការរីកចម្រើន លើគ្រប់វិស័យក្នុងរយៈពេលកន្លងមកនេះ។ ឯកឧត្តមបន្តទៀតថា សមិទ្ធផលដែលស្រុកសម្រេចបានកន្លងមកនេះ ជាគុណប្រយោជន៍ដ៏ឧត្តុង្គឧត្តមនៃប្រជាជាតិ ព្រមជាមួយកម្ម វិធីកំណែទម្រង់នានា របស់រាជរដ្ឋាភិបាល ហើយក្នុងបរិបទ នៃកំណែទម្រង់វិមជ្ឈការ និងវិសហមជ្ឈការ រាជរដ្ឋាភិបាលសម្រេចបាននូវសមទ្ធិផល ជាច្រើគួរជាទីមោទនភាព ។ជាមួយគ្នានោះ ឯកឧត្តម ទៀ សីហា បានស្នើដល់ លោកអភិបាលស្រុកទាំងពីរ ដែលទើបតែងតាំងថ្មី រួមទាំងក្រុមប្រឹក្សា គណៈអភិបាលស្រុក មន្រ្តីរាជការ កងកម្លាំងប្រដាប់អាវុធ និងកម្លាំងមានសមត្ថកិច្ចគ្រប់លំដាប់ថ្នាក់នៃស្រុកបន្ទាយស្រី និងស្រុកអង្គរធំ ត្រូវរួមសហ ការគ្នាអនុវត្តការងារសំខាន់ៗ ជាអាទិភាពមួយចំនួននោះគឺ ត្រូវរួមគ្នាថែរក្សាការពារសន្តិភាព ស្ថិរភាពនយោបាយ ស្ថិរភាពសង្គមឲ្យបានល្អ ក្នុងការតាមដានត្រួតពិនិត្យ និងដោះស្រាយបាតុភាពអសកម្ម និង ការថ្នាំងថ្នាក់នានា នៅមូលដ្ឋានឲ្យមានប្រសិទ្ធភាពខ្ពស់ ៕