សម្ដេច ហ៊ុន សែន ដាក់ចេញពាក្យស្លោកថ្មីថា ” អ្នកសារព័ត៌មាន ត្រូវផ្សាយព័ត៌មានពិត កុំប្រឌិតកំហុសដាក់អ្នកដទៃ”

(ភ្នំពេញ) ៖ «អ្នកសារព័ត៌មាន ត្រូវផ្សព្វផ្សាយព័ត៌មានពិត កុំប្រឌិតកំហុសដាក់អ្នកដទៃ» គឺជាពាក្យស្លោកថ្មីរបស់ សម្ដេច ហ៊ុន សែន នាយករដ្ឋមន្ត្រីនៃកម្ពុជា លើកឡើងក្នុងជំនួបសំណេះសំណាលជាមួយអ្នកសារព័ត៌មាន លើកទី៥ នៅមជ្ឈមណ្ឌលសន្និបាត និងពិព័រណ៌ កោះពេជ្រ នាល្ងាចថ្ងៃទី១៤ ខែមករា ឆ្នាំ២០២៣ ដោយសម្តេច ចង់សង្កត់ន័យអ្នកសារព័ត៌មានធ្វើយ៉ាងណា ផ្សាយតែព័ត៌មានពិត ដើម្បី លុបបំបាត់ការផ្សាយព័ត៌មានក្លែងក្លាយ ដល់ពេលនោះព័ត៌មានពិត នឹងមានតម្លៃ ហើយក្រុមមន្ត្រី ឬក្រុមមនុស្សដែលខូច នឹងខ្លាច ព័ត៌មានពិត ។សម្ដេចបានរំលឹកថា កាលមុន ខ្ញុំបានដាក់ថា ” អ្នកសារព័ត៌មាន កុំបំពានអ្នកដទៃ កុំបំភ្លៃកាពិត ” ហើយឥលូវនេះ ខ្ញុំក៏គួរនិយាយបន្ថែមថា ” អ្នកសារព័ត៌មាន ត្រូវផ្សព្វផ្សាយព័ត៌មានពិត កុំប្រឌិតកំហុសដាក់អ្នកដទៃ ” ចឹងយើងមានពាក្យស្លោក២ ត្រូវចាំព្រោះជួន កាលអាងតែខ្លូនមានហ្វេសប៊ុក ទូរស័ព្ទតែមួយគ្រឿង ផ្សាយទៅជេរគេជេរឯង ប្រម៉ាថគេ ប្រម៉ាថឯង ហើយតាំងខ្លួនជាចៅក្រមកាត់សេចក្តី ឯលើកនេះ គឺខ្ញុំចេញសារមួយទៀតដាក់ថា ” អ្នកសារព័ត៌មានត្រូវផ្សាយព័ត៌មានពិត កុំប្រឌិតកំហុសដាក់អ្នកដទៃ”  ។សម្តេច បានអំពាវនាវឱ្យពលរដ្ឋ និងស្ថាប័នសារព័ត៌មាន សូមបន្តចូលរួមប្រយុទ្ធប្រឆាំងព័ត៌មានមិនពិត និងព័ត៌មានក្លែងក្លាយ ទាំងក្នុងក្របខ័ណ្ឌជាតិ និងអន្តរជាតិ ខណៈបច្ចុប្បន្ន តំណាងសារព័ត៌មាន របស់កម្ពុជា ក៏មាននៅក្នុងក្របខ័ណ្ឌស្ថាប័នជាតិអាស៊ាន ដែលតម្រូវឱ្យស្ថាប័នព័ត៌មានរបស់កម្ពុជាធ្វើការប្រយុទ្ធប្រឆាំងនឹងព័ត៌មានមិនពិត និងព័ត៌មានក្លែងក្លាយឱ្យកាន់តែសកម្មថែមទៀត ព្រោះព័ត៌មានមិនពិត និងព័ត៌មានក្លែងក្លាយជាផ្នែកចិត្តសាស្រ្ត ដែលធ្វើឱ្យសង្គមមានភាពចលាចល អស្ថេរភាពនយោបាយ អសន្តិសុខសង្គម និងកើតមានអរិយភាពជាមួយបរទេស ។បញ្ហាព័ត៌មានមិនពិតនេះ មិនមែនកើតមានតែនៅកម្ពុជាទេ គឺមាននៅ ទូទាំងពិភពលោក រាប់ទាំងនៅក្នុងអង្គការសហប្រជាជាតិ ផងដែរ គឺសុទ្ធតែលើកឡើងពីបញ្ហាព័ត៌មានក្លែងក្លាយនេះ ។

ព័ត៌មានមិនពិតដែលត្រូវបានផ្សព្វផ្សាយចេញទៅ នឹងឆាប់សាបរលាប នៅពេលដែលអ្នកសារព័ត៌មានជាច្រើនទៀតដែលប្រកាន់ជំហរផ្សាយតែព័ត៌មានពិត ចូលមកដល់ ។

មួយវិញទៀត ក្រុមមនុស្ស ឬក្រុមអ្នកសារព័ត៌មាន ដែលចូលចិត្តផ្សាយព័ត៌មានក្លែងក្លាយ នឹងលែងមានអ្នកគាំទ្របន្តទៀត និងលែងមានប្រភពផ្តល់ព័ត៌មាន ឬផ្តល់បទសម្ភាសន៍ឱ្យទៀតផង ៕