Connect with us

ព័ត៌មានកីឡា

រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន បានធ្វើទស្សនកិច្ចនៅសហព័ន្ធកីឡាទោចក្រយានអន្តរជាតិ ក្នុងប្រទេសស្វីស

(ស្វីស)៖ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន បានដឹកនាំគណៈប្រតិភូទៅទស្សនានៅទីស្នាក់ការសហព័ន្ធកីឡាទោចក្រយានអន្តរជាតិដែលមានទីស្នាក់ការកណ្តាលនៅទីក្រុង Aigle ប្រទេសស្វីស កាលពីចុងសប្តាហ៍មុន នៅខាងក្រៅកិច្ចប្រជុំប្រចាំឆ្នាំនៃវេទិកាសេដ្ឋកិច្ចពិភពលោកឆ្នាំ ២០២៣ ។ក្នុងកិច្ចពិភាក្សានោះ ឯករដ្ឋមន្ត្រីក្រសួងពាណិជ្ជកម្ម បានជម្រាបជូនពីកិច្ចសហប្រតិបត្តិការរវាងសហព័ន្ធខ្មែរ  និងសហព័ន្ធអន្តរជាតិ នូវការងារមួយចំនួន រួមមាន៖ ការបណ្ដុះបណ្ដាលគ្រូបង្វឹកកម្រិត១ របស់សហព័ន្ធខ្មែរ គម្រោងជំនួយជាសម្ភារៈ មានដូចជាសម្លៀកបំពាក់ និងកង់គួក ព្រមទាំងកង់ភ្នំសម្រាប់កីឡាករហ្វឹកហាត់ និងគម្រោងជំនួយពិសេសសម្រាប់ការផ្សព្វផ្សាយយុទ្ធនាការ “ប្រជាជនម្នាក់ កង់មួយគ្រឿង” ឆ្ពោះទៅកីឡាស៊ីហ្គេមឆ្នាំ២០២៣ ។

ឯកឧត្តមបានបញ្ជាក់បន្ថែមពីការត្រៀមខ្លួនរបស់កីឡាករទោចក្រយានកម្ពុជា ដើម្បីចូលរួមប្រកួតនៅក្នុងកីឡាស៊ីហ្គេមឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះចាប់ពីថ្ងៃទី៥-១៧ ខែឧសភា ឆ្នាំ២០២៣ ខាងមុខនេះ ។

ឆ្លៀតក្នុងឱកាសនោះ ឯកឧត្តម ក៏បានអញ្ជើញប្រធានសហព័ន្ធកីឡាទោចក្រយានអន្តរជាតិចូលរួមទស្សនាព្រឹត្តិការណ៍កីឡាស៊ីហ្គេមឆ្នាំ ២០២៣ ដោយផ្ទាល់នៅកម្ពុជា ព្រមទាំងស្នើសុំជំនួយបន្ថែមពី សហព័ន្ធកីឡាទោចក្រយានអន្តរជាតិ ដូចជាការបណ្ដុះបណ្ដាល ឧបករណ៍និងសម្ភារៈសម្រាប់រៀបចំការប្រកួត ក៏ដូចជាកង់ និងសម្ភារៈផ្សេងៗមួយចំនួនទៀត ដើម្បីបន្តជំរុញការអភិវឌ្ឍន៍កីឡាទោចក្រយាននៅកម្ពុជាឱ្យរីកចម្រើនបន្ថែមទៀត ៕

Click to comment

Leave a Reply

Your email address will not be published. Required fields are marked *

Facebook