Connect with us

ព័ត៌មានទាន់ហេតុការណ៍

បើតាមការព្យាករណ៍ថ្មីមួយ​​​ នៅឆ្នាំ២០៣២ ចិននឹងក្លាយប្រទេសសេដ្ឋកិច្ចលេខ «១» របស់ពិភពលោក

ប៉េកាំង៖ មជ្ឈមណ្ឌលស្រាវស្រាវការអភិវឌ្ឍ (DRC) នៃក្រុមប្រឹក្សារដ្ឋចិន មានមូលដ្ឋានក្នុងទីក្រុងប៉េកាំងបានព្យាករណ៍ថា ចិននឹងវ៉ាដាច់សហរដ្ឋអាមេរិក ក្លាយជាមហាអំណាចសេដ្ឋកិច្ចលេខ ១ នៅលើពិភពលោកនៅឆ្នាំ២០៣២ បើទោះជាអរិភាពជាមួយសហរដ្ឋអាមេរិក នឹងបន្តកើនឡើងយ៉ាងណាក៏ដោយ។ នេះបើតាមការដកស្រង់ព័ត៌មានពី South China Morning Post នៅរសៀលថ្ងៃសុក្រ ទី០៤ ខែកញ្ញា ឆ្នាំ២០២០។

ការព្យាករណ៍របស់ក្រុមអ្នកស្រាវជ្រាវមកពីមជ្ឈមណ្ឌល DRC ដែលចេញផ្សាយនៅក្នុងសប្ដាហ៍នេះ ធ្វើឡើងដោយផ្អែកលើភាពជោគជ័យ នៃយុទ្ធសាស្ត្រអភិវឌ្ឍថ្មីៗរបស់រដ្ឋាភិបាលចិន ដែលបាននិងកំពុងផ្ដោតជាសំខាន់ លើទីផ្សារនៅក្នុងស្រុក, ជំរុញកំណើនសេដ្ឋកិច្ច និងការប្រកួតជែងខាងបច្ចេកវិទ្យា និងភូមិសាស្រ្តនយោបាយ ជាមួយសហរដ្ឋអាមេរិក។

បើតាមការព្យាករណ៍ដដែល គ្មានកត្តាអ្វីអាចមកបង្អាក់ដំណើរ នៃកំណើនសេដ្ឋកិច្ចចិនបានឡើយ ដោយចំណែកទីផ្សាររបស់ចិន នៅក្នុងសេដ្ឋកិច្ចសកលនឹងកើនឡើងដល់ ១៨.១ភាគរយនៅក្នុងឆ្នាំ២០២៥ បើធៀបទៅនឹង ១៦.២ភាគរយកាលពីឆ្នាំ២០១៩ ខណៈចំណែក ឬភាគរយនៃសេដ្ឋកិច្ចសកលរបស់សហរដ្ឋអាមេរិក នឹងធ្លាក់ចុះ មកនៅត្រឹម ២១.៩ភាគរយនៅឆ្នាំ២០១៥ ធៀបទៅនឹង ២៤.១ភាគរយកាលពីឆ្នាំ២០១៩។ តែទន្ទឹមគ្នាកំណើនសេដ្ឋកិច្ចបែបនេះ នឹងធ្វើឱ្យជម្លោះរវាងចិន និងសហរដ្ឋអាមេរិក នឹងកើនឡើងរឹតតែខ្លាំង នៅរយៈពេល ០៥ឆ្នាំខាងមុខ។

គួរបញ្ជាក់ថា កាលពីខែសីហាកន្លងទៅ លោក ចាស្ទីន លីន យីហ្វុ (Justin Lin Yifu) ជាសាស្ត្រាចារ្យម្នាក់មកពីសាកលវិទ្យាល័យប៉េកាំង និងជាអតីតប្រធានផ្នែកសេដ្ឋកិច្ច នៃធនាគារពិភពលោក ក៏បានព្យាករណ៍ដែរថា សេដ្ឋកិច្ចចិននឹងវ៉ាដាច់សហរដ្ឋអាមេរិកនៅឆ្នាំ២០៣០។ តែទោះបែបនេះក្ដី ក៏នៅមានមតិជាច្រើនយល់ថា ចិននឹងមិនអាចវ៉ាដាច់ សហរដ្ឋអាមេរិក ក្លាយជាមហាអំណាចសេដ្ឋកិច្ចលេខ ១ នៅលើពិភពលោកបានឡើយ ប្រសិនបើប្រជាជនចិនវ័យចំណាស់បន្តកើនឡើង ហើយទោះជាចិនធ្វើបានសម្រេចមែន ក៏វាគ្រាន់តែជាការវ៉ាដាច់ នៅរយៈពេលខ្លីប៉ុណ្ណោះ៕

Click to comment

Leave a Reply

Your email address will not be published.

Facebook