សម្តេច ស ខេង៖ FATF ដកកម្ពុជាចេញពីបញ្ជីពណ៌ប្រផេះនឹងរួមចំណែកបង្កើនទំនុកចិត្តវិនិយោគិន

សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានមានប្រសាសន៍ថា ការដក FATF របស់កម្ពុជាចេញពីបញ្ជីពណ៌ប្រផេះ គឺជាសមិទ្ធិផលដែលនឹងរួមចំណែកបង្កើនទំនុកចិត្តដល់អ្នកវិនិយោគក្នុងការធ្វើអាជីវកម្មនៅកម្ពុជា។

ការថ្លែងបែបនេះ ធ្វើឡើងនៅពេលដែលសម្តេច ស ខេង បានអនុញ្ញាតឱ្យគណៈប្រតិភូក្រុមប្រឹក្សាធុរកិច្ចអាមេរិក-អាស៊ាន ចូលជួបសម្តែងការគួរសម នៅថ្ងៃទី៣ ខែមិនា ឆ្នាំ២០២៣។

សម្តេច ស ខេង បន្តទៀតថា រាជរដ្ឋាភិបាលកម្ពុជា កំពុងខិតខំប្រឹងប្រែងដោះស្រាយបញ្ហាគ្រោះថ្នាក់ចរាចរណ៍ និងបញ្ហាគ្រឿងញៀនខុសច្បាប់ រួមទាំងការងារពាក់ព័ន្ធនឹងការប្រយុទ្ធប្រឆាំងនឹងឧក្រិដ្ឋកម្មឆ្លងដែនគ្រប់ប្រភេទ។

មូលនិធិរូបិយវត្ថុអន្តរជាតិសម្រាប់ការលាងលុយកខ្វក់ (FATF) ដែលមានមូលដ្ឋាននៅទីក្រុងប៉ារីសកាលពីពេលថ្មីៗនេះ បានប្រកាសដកប្រទេសកម្ពុជាចេញពីបញ្ជីពណ៌ប្រផេះនៃប្រទេសដែលមានហានិភ័យនៃការលាងលុយកខ្វក់។ ប្រទេសកម្ពុជាបានស្ថិតក្នុង “បញ្ជីពណ៌ប្រផេះ” របស់ FATF នៃបណ្តាប្រទេសដែលមានហានិភ័យនៃការលាងលុយកខ្វក់រយៈពេលបួនឆ្នាំជាប់ៗគ្នាចាប់តាំងពីឆ្នាំ 2019 មក។

សម្តេច ស ខេង បានថ្លែងអំណរគុណដល់ FATF ដែលបានគាំទ្រដល់កិច្ចខិតខំប្រឹងប្រែងជាច្រើនឆ្នាំរបស់រាជរដ្ឋាភិបាលកម្ពុជា តាមរយៈការដកកម្ពុជាចេញពីបញ្ជី។

ឧបនាយករដ្ឋមន្ត្រីបានប្រាប់គណៈប្រតិភូអាមេរិកថា តាមរយៈបទពិសោធន៍នៃការបោះឆ្នោតកន្លងមកជាច្រើន ទាំងគណបក្សនយោបាយ និងប្រជាជនកម្ពុជាកាន់តែមានភាពចាស់ទុំចំពោះមុខការប្រកួតប្រជែង ក៏ដូចជាការចូលរួមក្នុងដំណើរការប្រជាធិបតេយ្យ។

សម្តេច ស ខេង ប្តេជ្ញារក្សាបរិយាកាសសង្គមឱ្យបានល្អ ដើម្បីបម្រើដំណើរការបោះឆ្នោតនាពេលខាងមុខឱ្យប្រព្រឹត្តទៅដោយសេរី ត្រឹមត្រូវ និងយុត្តិធម៌ គ្មានអំពើហិង្សា និងស្របតាមគោលការណ៍ប្រជាធិបតេយ្យសេរីពហុបក្ស។

លោក Michael Michalak តំណាងក្រុមប្រឹក្សាធុរកិច្ចអាមេរិក-អាស៊ាន បានថ្លែងអំណរគុណចំពោះសម្តេច ស ខេង ដែលបានផ្តល់ព័ត៌មានថ្មីៗ ក៏ដូចជាព័ត៌មានទូទៅអំពីស្ថានភាពសេដ្ឋកិច្ចទូទៅ សន្តិសុខ និងការអភិវឌ្ឍន៍នយោបាយនៅកម្ពុជា។