ប្រធានប្រតិបត្តិស.យ.ស.ស ខេត្តមណ្ឌលគិរី ជំរុញដល់យុវជនឱ្យចូលរួមការងារសង្គមកាន់តែច្រើន

មណ្ឌលគិរី៖ ប្រធានប្រតិបត្តិសម្ព័ន្ធយុវជនស្រឡាញ់សន្តិភាព ខេត្តមណ្ឌលគិរី ហៅកាត់ថាស.យ.ស.ស បាន ជំរុញដល់យុវជន ត្រូវចេះសាមគ្គីគ្នា ក្នុងការចូលរួមការងារសេដ្ឋកិច្ច-សង្គម ដើម្បីឱ្យខេត្តមានការរីកចម្រើន។
ការជំរុញបែបនេះធ្វើឡើង ក្នុងពិធីជួបសំណេះសំណាល និងចែកប័ណ្ណសរសើរដល់សមាជិក សមាជិកា នៃសម្ព័ន្ធយុវជនស្រឡាញ់សន្តិភាព ស្រុកអូររាំង ដោយមានការចូលរួមពីសំណាក់លោក សៀក មុន្នី ប្រធានកិត្តិយស ស.យ.ស.ស ស្រុកអូររាំង លោក លោកស្រី សមាជិក សមាជិកា នៃសម្ព័ន្ធយុវជនស្រលាញ់សន្តិភាពខេត្ត និងស្រុក/ឃុំជាច្រើនរូប ដែលប្រព្រឹត្តទៅនៅស្រុកអូររាំង នាព្រឹកថ្ងៃទី២៦ ខែមីនា ឆ្នាំ២០២៣។

លោក សាន់ ដារិទ្ធិបានថ្លែងថា យុវជន គឺជាទំពាំងស្នង ឫស្សី ដែលជាកម្លាំងស្នូល ក្នុងការចូលរួមសកម្មភាពសេដ្ឋកិច្ច-សង្គម និងកិច្ចការងារផ្សេងៗ នៅក្នុងមូលដ្ឋាន ដើម្បីរួមចំណែកជួយអភិវឌ្ឍន៍ប្រទេសជាតិ ឱ្យមានការរីក ចម្រើនលើគ្រប់វិស័យ។ លោក ក៏បានណែនាំដល់យុវជនទាំង អស់ ត្រូវរក្សាទំនាក់ទំនងជាមួយយុវជន ដែលមានឆន្ទ: និងត្រូវចេះសហការជាមួយយុវជនដទៃទៀត ដោយត្រូវពង្រឹង និងពង្រីកទំនាក់ទំនងល្អ សម្រាប់ថ្ងៃនេះ និងថ្ងៃទៅអនាគត។ បន្ថែមលើសនេះ យុវជនទាំងអស់ ត្រូវបន្តចូលរួមចំណែកថែរក្សាសន្តិភាព ជាពិសេស ប្តេជ្ញាការពារ និងគាំទ្របេក្ខភាព សម្តេចតេជោ ហ៊ុន សែន ជានាយករដ្ឋមន្រ្តី នៃព្រះរាជាណាចក្រកម្ពុជា និងគាំទ្រឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្រ្តីនាពេលអនាគត។

ការចូលរួម សហការគាំទ្រគ្រប់សកម្មភាពរបស់សម្ព័ន្ធយុវជន គឺជាចំណែកមួយ ក្នុងការការពារស្ថិរភាព នយោបាយ សន្តិសុខសណ្តាប់ធ្នាប់ ការពារសមិទ្ធផល និងស្នាដៃជាប្រវត្តិសាស្ត្ររបស់រាជរដ្ឋាភិបាល ក៏ដូចជាអាជ្ញាធរខេត្ត បានសម្រេចនាពេលកន្លងមក។
នាឱកាសនោះ លោក សាន់ ដារិទ្ធិ ប្រធានប្រតិបត្តិសម្ព័ន្ធយុវជនស្រឡាញ់សន្តិភាពខេត្ត ក៏បានផ្តល់លិខិតថ្លែង អំណរគុណ និងប័ណ្ណសរសើរជូនថ្នាក់ដឹកនាំ និងសមាជិក សមាជិកា និងសប្បុរសជនទាំងអស់ ដែលតែងតែចូលរួមគ្រប់សកម្មភាពរបស់សម្ព័ន្ធយុវជនស្រឡាញ់សន្តិភាពនាពេលកន្លងមកផងដែរ៕