ប្រធានរដ្ឋសភា ចាត់ទុកដំណើរទស្សនកិច្ចរបស់នាយករដ្ឋមន្ត្រីម៉ាឡេស៊ី នឹងពង្រឹងចំណងមិត្តភាពកម្ពុជា-ម៉ាឡេស៊ី ដែលមានអាយុកាលជាង ៦០ឆ្នាំ

សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា បានមានប្រសាសន៍ថា ដំណើរទស្សនកិច្ចផ្លូវការរបស់នាយករដ្ឋមន្ត្រីម៉ាឡេស៊ី នឹងរួមចំណែកបន្ថែមទៀតដល់ការពង្រឹងទំនាក់ទំនងល្អ មិត្តភាព និងកិច្ចសហប្រតិបត្តិការល្អរវាងប្រជាជាតិទាំងពីរ ដែលមាន រឹងមាំជាងប្រាំមួយទសវត្សរ៍។

ការ ថ្លែង បែបនេះ បាន ធ្វើឡើង នៅពេល នាយករដ្ឋមន្ត្រី ម៉ាឡេស៊ី ឯកឧត្តម Dato’ Seri Anwar bin Ibrahim និង គណៈប្រតិភូ ចូលជួប សម្តែង ការគួរសម ជាមួយ សម្តេច ហេង សំរិន ប្រធានរដ្ឋសភា នៅ វិមាន រដ្ឋសភា កាលពី ថ្ងៃទី២៨ ខែមីនា ឆ្នាំ២០២៣។

នាយករដ្ឋមន្ត្រីម៉ាឡេស៊ីបានថ្លែងអំណរគុណចំពោះប្រធានរដ្ឋសភាចំពោះការស្វាគមន៍យ៉ាងកក់ក្តៅ និងបដិសណ្ឋារកិច្ចចំពោះគណៈប្រតិភូ ដោយសង្កត់ធ្ងន់ថា ដំណើរទស្សនកិច្ចរបស់លោកនឹងរួមចំណែកដល់ការពង្រឹងកិច្ចសហប្រតិបត្តិការរវាងប្រទេសទាំងពីរទាំងផ្នែកនីតិប្បញ្ញត្តិ និងនីតិប្រតិបត្តិ។

ប្រធានរដ្ឋសភាបានកត់សម្គាល់ថា រដ្ឋាភិបាលទាំងពីរបានសហការគ្នាយ៉ាងល្អទាំងក្នុងក្របខ័ណ្ឌទ្វេភាគី និងតំបន់ ព្រមទាំងនិងសកលលោក។

ស្ថាប័ននីតិប្បញ្ញត្តិនៃប្រទេសទាំងពីរក៏បានសហការយ៉ាងទូលំទូលាយក្នុងក្របខ័ណ្ឌទ្វេភាគី និងពហុភាគី។ ក្រៅពីកិច្ចសហប្រតិបត្តិការក្នុងក្របខណ្ឌនៃក្រុមមិត្តភាពរដ្ឋសភា ដើម្បីផ្លាស់ប្តូរបទពិសោធន៍លើការងារនីតិបញ្ញត្តិ សភាទាំងពីរក៏បានគាំទ្រគ្នាទៅវិញទៅមកលើវេទិកាអន្តរសភាតំបន់ និងពិភពលោកផ្សេងៗគ្នា។

ប្រធានរដ្ឋសភាបានថ្លែងអំណរគុណដល់រដ្ឋាភិបាល និងប្រជាជនម៉ាឡេស៊ី ដែលបានចូលរួមចំណែកក្នុងដំណើរការសន្តិភាព និងការអភិវឌ្ឍន៍នៅកម្ពុជា។