ឯកឧត្តមបណ្ឌិត អ៊ិត សំហេង គាំទ្រ អង្គការ ILO ចង់បង្កើតឱ្យមានគម្រោងជួយដល់ការអភិវឌ្ឍជំនាញនៅកម្ពុជា

(ភ្នំពេញ)៖ ឯកឧត្តមបណ្ឌិត អ៊ិត សំហេង គាំទ្រចំពោះអង្គការ ILO ដែលចង់បង្កើតឱ្យមានគម្រោងជួយដល់ការអភិវឌ្ឍជំនាញនៅកម្ពុជា ដើម្បីឆ្លើយតបទៅនឹងស្ថានភាពរីកចម្រើននៃសង្គមសេដ្ឋកិច្ចកម្ពុជានាពេលបច្ចុប្បន្ន។

ក្រោយបញ្ចប់សិក្ខាសាលាត្រីភាគី ស្ដីពីការត្រួតពិនិត្យប្រចាំឆ្នាំលើកម្មវិធីការងារសមរម្យសម្រាប់ប្រទេសកម្ពុជាឆ្នាំ២០១៩-២០២៣ ធ្វើឡើងនៅសណ្ឋាគារភ្នំពេញ កាលពីថ្ងៃទី៣០ ខែមីនា ឆ្នាំ២០២៣ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានទទួលជួបពិភាក្សាការងារជាមួយ លោក Graeme Buckley នាយកការិយាល័យអង្គការ ILO ប្រចាំប្រទេសកម្ពុជា ឡាវ និងថៃ និងសហការី នៅសណ្ឋាគារភ្នំពេញ។

ឯកឧត្តមបណ្ឌិត អ៊ិត សំហេង បានសំដែងនូវការគាំទ្រចំពោះគំនិតផ្តួចផ្តើមរបស់អង្គការ ILO ដែល លោក Graeme Buckley បានលើកឡើងពីគំនិតផ្តួចផ្តើមចង់បង្កើតឱ្យមានគម្រោងជួយដល់ការអភិវឌ្ឍជំនាញ ក្រោមកិច្ចសហការផ្តល់ហិរញ្ញប្បទានដោយធនាគារអភិវឌ្ឍន៍អាស៊ី (ADB) និងទីភ្នាក់ងារបារាំងសម្រាប់ការអភិវឌ្ឍន៍ (AFD) ឱ្យអង្គការ ILO ធ្វើជាអ្នកសម្របសម្រួលគម្រោងនេះដោយមានអ្នកបច្ចេកទេស ជួយលើការបណ្តុះបណ្តាលបច្ចេកទេស និងវិជ្ជាជីវ: ទាំងការរៀបចំជំនាញឡើងវិញ (Reskilling) និងការបង្កើនជំនាញ (Upskilling)។

ឯកឧត្តមរដ្ឋមន្រ្តីគាំទ្រឱ្យមានកិច្ចប្រជុំនាដើមខែមេសានេះ ដោយមានការចូលរួមពីគ្រប់ភាគីពាក់ព័ន្ធដើម្បីប្រមូលធាតុចូលបន្ថែមសម្រាប់ជាមូលដ្ឋានក្នុងការរៀបចំកម្មវិធីការងារសមរម្យដំណាក់កាលទី៦ ស្របទៅតាមគោលនយោបាយ និងយុទ្ធសាស្រ្តអភិវឌ្ឍន៍ជាតិរបស់រាជរដ្ឋាភិបាល ដែលនឹងដាក់ចេញនូវយុទ្ធសាស្រ្តបញ្ចកោណសម្រាប់អាណត្តិទី៧។

ឯកឧត្តមរដ្ឋមន្ត្រី បានគាំទ្រផងដែរ ចំពោះគម្រោងដែលចង់ជួយដល់ការធ្វើឱ្យប្រសើរនូវសុវត្ថិភាពធ្វើដំណើរ និងមធ្យោបាយដឹកជញ្ជូនរបស់កម្មករ និយោជិត ដែលនេះឆ្លើយតបទាំងស្រុងទៅនឹងអនុសាសន៍ដែលសម្តេចតេជោនាយករដ្ឋមន្រ្តី បានផ្តល់ក្នុងអំឡុងពេលចុះជួបសួរសុខទុក្ខបងប្អូនកម្មករនិយោជិតកន្លងមក។

ឯកឧត្តរដ្ឋមន្រ្តី ស្នើឱ្យគម្រោងរោងចក្រកាន់តែប្រសើរនៅកម្ពុជា សហការជាមួយគណៈកម្មាធិការជាតិសុវត្ថិភាពចរាចរផ្លូវគោក និងបេឡាជាតិសន្តិសុខសង្គម ដែលមានយន្តការជាក្រុមការងារសុវត្ថិភាពចរាចរផ្លូវគោកសម្រាប់គាំពារកម្មករនិយោជិត ដើម្បីបង្កើតឱ្យមានស្តង់ដាសមស្របមួយ

កំណត់នូវមធ្យោបាយដឹកជញ្ជូនកម្មករនិយោជិតប្រកបដោយសុវត្ថិភាព។ ពាក់ព័ន្ធនឹងគម្រោងនេះ ក៏មានការចូលរួមគិតគូរពីទីភ្នាក់ងារអង្គការសហប្រជាជាតិជាច្រើន ដែលក្នុងនោះ គណៈកម្មការសេដ្ឋកិច្ច និងសង្គមនៃអង្គការសហប្រជាជាតិ ប្រចាំតំបន់អាស៊ីនិងប៉ាស៊ីហ្វិក (UN-ESCAP) ដែលចូលរួមផ្តល់មូលនិធិសម្រាប់សុវត្ថិភាពផ្លូវថ្នល់ អង្គការសុខភាពពិភពលោក (WHO) អង្គការ UNICEF និងអង្គការ ILO និងអង្គការមូលនិធិរបួសអាស៊ី (AIP)

ក៏បានធ្វើសកម្មភាពផ្សព្វផ្សាយការយល់ដឹងជាច្រើនផងដែរ។
លោក Graeme Buckley បានថ្លែងអំណរគុណឯកឧត្តមរដ្ឋមន្រ្តី និងសំដែងនូវការពេញចិត្តជាខ្លាំងចំពោះកិច្ចសហប្រតិបត្តិការជាមួយរដ្ឋាភិបាលកម្ពុជា ជាពិសេសក្រសួងការងារ និងបណ្តុះបណ្តាលវិជ្ជាជីវៈ នាពលកន្លងមក ដែលទទួលបានលទ្ធផលជាផ្លែផ្កាល្អប្រសើរ៕