ក្រុងខេមរភូមិន្ទ ខេត្តកោះកុង នឹងមានកំពង់ផែសមុទ្រថ្មីមួយតម្លៃជាង ១លានដុល្លារ

កោះកុង៖ ទីក្រុងខេមរភូមិន្ទ ខេត្តកោះកុង នឹងមានកំពង់ផែសមុទ្រ​ថ្មី​មួយតម្លៃ ១.៥លានដុល្លារអាមេរិក ដោយប្រើប្រាស់ ២ឆ្នាំ ដើម្បីបម្រើដល់ពហុវិស័យក្នុងការជួយសម្រួលដល់ប្រព័ន្ធដឹកជញ្ចូនទំនិញរាយ និងវិស័យទេសចរណ៍តាមដៃព្រែកកោះប៉ោ ក្រុងខេមរភូមិន្ទ។

តាមរបាយការណ៍សង្ខេបរបស់ក្រសួងសាធារណការ និងដឹកជញ្ចូនបានឱ្យដឹងថា គម្រោ​ងអភិវឌ្ឍន៍ស្ថាបនាផែសមុទ្រនេះ គ្រោងចំណាយថវិកាសរុបប្រមាណ ១.៥លានដុល្លារ ដោយប្រើប្រាស់រយៈពេល ២ឆ្នាំ ហើយគ្រោង​បញ្ចប់នៅឆ្នាំ ២០២២ខាងមុខ។

របាយការណ៍បន្តថា ផែសមុទ្រថ្មីសន្លាងនេះ នឹងសម្រួលដល់ប្រព័ន្ធដឹកជញ្ចូនទំនិញរាយ និងវិស័យ​ទេស​ចរ​ណ៍ ព្រមទាំងពហុវិស័យ​តាមដៃព្រែកកោះប៉ោ ក្រុងខេមរភូមិន្ទ ជំនួសឱ្យផែ​ចាស់រក្សាទុកនៅកន្លែងដដែលមានសភាពទ្រុឌទ្រោមយូរឆ្នាំមកហើយ។

លោក អន ដាវុធ ប្រធានមន្ទីរសាធារណការ និងដឹកជញ្ចូនខេត្តកោះកុងឱ្យដឹងនៅថ្ងៃទី៣១ មីនាថា គម្រោ​​ងសា​ងស​ង់​កំពង់ផែថ្មី​​​នេះប្រភេទជាបេតុងមានប្រវែង ៦៩ម៉ែត្រ និងទទឹង ១៦.៥ម៉ែត្រ។ ស្ពានបេតុ​ងភ្ជា​ប់​ទៅផែប្រវែង ២៨ម៉ែត្រ ទទឹង ៨ម៉ែត្រចំនួន ២កន្លែង។

លោកបន្ថែមថា សម្រាប់ផ្លូវបេតុងចេញចូលផែទំហំ ១៦២២.៨ ម៉ែត្រការ៉េកម្រាស់ ០.២៣ ម៉ែត្រ រីឯផ្លូវដើរទំហំ ១០០.៨ ម៉ែត្រការ៉េ កម្រាស់ ០.២ ម៉ែត្រ៕