កងកម្លាំងប្រដាប់អាវុធ

កម្លាំងកងរាជអាវុធហត្ថខេត្តព្រះវិហារ ដឹកនាំដោយលោកវរសេនីយ៍ត្រី សុខ សយ អនុប្រធានមន្ទីរស្រាវជ្រាវ និងបង្ក្រាបបទល្មើសព្រៃឈើ

(ព្រះវិហា)៖ កម្លាំងកងរាជអាវុធហត្ថខេត្តព្រះវិហារ ដឹកនាំដោយលោកវរសេនីយ៍ត្រី សុខ សយ អនុប្រធានមន្ទីរស្រាវជ្រាវ និងបង្ក្រាបបទល្មើស សហការជាមួយកម្លាំងផ្នែកសឹករងឆែប រួមនិងមន្ដ្រីឧទ្យានុរក្ស ដែនជម្រកសត្វព្រៃព្រះរការ-ឆែប ធ្វើការចុះបង្ក្រាប និងដកហូត ឈើអារជាច្រើនសន្លឹក/ដុំ នៅទីតាំងស្ដុកសន្និធិឈើអារ ចំនួន ០២កន្លែងដោយគ្មានលិខិតអនុញ្ញាតិ។ ប្រតិបត្តិការណ៍ចុះបង្ក្រាបនាពេលនេះ បានធ្វេីឡេីងកាលពីវេលាម៉ោង ១៣:៣០នាទី ថ្ងៃទី១០ ខែឧសភា ឆ្នាំ២០២៣ ។

តាមការឱ្យដឹងពីកម្លាំងសមត្ថកិច្ចជំនាញដែលចុះបង្ក្រាប បានឱ្យដឹងថា ទីតាំងចំនួន០២កន្លែង ដែលស្ដុកឈើប្រណិតលួចលាក់ដែលត្រូវបានកម្លាំងចុះបង្ក្រាបនេះ ៖

ទី១.ស្ថិតនៅចំណុចណាំសាម ស្ថិតក្នុងភូមិខាំកឺត ឃុំកំពង់ស្រឡៅមួយ ស្រុកឆែប ខេត្តព្រះវិហារ ។

ទី២.ស្ថិតនៅចំណុចព្រីងចាស់ ស្ថិតក្នុងភូមិខាំកឺត ឃុំកំពង់ស្រឡៅមួយ ស្រុកឆែប ខេត្តព្រះវិហារ ។

ជាលទ្ធផលបានធ្វើការដកហូតឈើអារប្រភេទលេខ១ (ផ្ចឹក,គគី) និងប្រភេទលេខ២ (ខ្លុង,ត្បែង) ជាច្រើន សន្លឹក/ដុំ ដោយមិនទាន់បានវាស់វែង។ ក្រោយពីកម្លាំងសមត្ថកិច្ចជំនាញបង្ក្រាបបានឈើទាំងនោះ បានជួលគោយន្តកន្រ្តៃដឹកយកមករក្សាទុកនៅស្នាក់ការបរិស្ថានអូរកាប៉ុក និងធ្វើសំណុំបែបបទប្រគល់ទៅឱ្យជំនាញចាត់ការបន្ដតាមនីតិវិធីច្បាប់ ។

ក្រោមការចង្អុលបង្ហាញពីឯកឧត្តម គីម រិទ្ធី អភិបាលនៃគណ:អភិបាលខេត្ត បានចេញចំណាត់ការទៅដល់កម្លាំងសមត្ថកិច្ចគ្រប់ផ្នែក មន្ទីរជំនាញពាក់ព័ន្ធ និងគណ:បញ្ជាការឯកភាពរដ្ឋបាលក្រុងស្រុក អោយចុះត្រួតពិនិត្យ បង្ក្រាប និងចាប់ការដឹកជញ្ជូនឈើខុសច្បាប់ទាំងអស់ នៅលើថ្នល់ជាតិដែលចេញ-ចូលខេត្ត ហើយបញ្ជូនវត្ថុតាងបទល្មើសទៅតុលាការ និងរាយការណ៍ជូនអភិបាលខេត្ត និងនាយឧត្តមសេនីយ៍មេបញ្ជាការកងរាជអាវុធហត្ថលើផ្ទៃប្រទេសជាប្រចាំនូវលទ្ធផលនៃយុទ្ធនាការនេះ ហើយផ្សព្វផ្សាយអោយបានទូលំទូលាយ ៕