ការវិនិយោគបរទេសដែលត្រូវបានអនុម័តរបស់ប្រទេសហ្វីលីពីនបានឈានដល់ ៣ ពាន់លានដុល្លារក្នុងត្រីមាសទី ១

អន្តរជាតិ៖ អាជ្ញាធរស្ថិតិហ្វីលីពីន (PSA) បានឱ្យដឹងថា ការវិនិយោគបរទេសសរុបរបស់ប្រទេសហ្វីលី ពីន ដែលបានអនុម័តនៅក្នុងត្រីមាសទីមួយនៃឆ្នាំ ២០២៣ បានកើនឡើងដល់ ១៧២,៧០ ពាន់លានប៉េសូ (៣ ពាន់លានដុល្លារ) ដែលខ្ពស់ជាងត្រីមាសដូចគ្នាក្នុងឆ្នាំ ២០២២ ដែលមានចំនួន ៨,៩៨ ពាន់លានប៉េសូ (១៥៩,៩ លានដុល្លារ)។ នេះបើយោងតាមការចុះផ្សាយរបស់សារព័ត៌មាន Xinhua។

ទីភ្នាក់ងារស្ថិតិបាននិយាយថាការប្តេជ្ញាចិត្តវិនិយោគបរទេសភាគច្រើនសម្រាប់ត្រីមាសទីមួយគឺមកពីប្រទេសអាល្លឺម៉ង់ (៩០,៩ ភាគរយ) បន្ទាប់មកប្រទេសជប៉ុន (២,២ភាគរយ) និងហូឡង់ (១,៥ភាគរយ)។ យោងតាមទីភ្នាក់ងារនេះបានឱ្យដឹងថា ប្រទេសអាល្លឺម៉ង់បានសន្យាផ្តល់ប្រាក់ចំនួន ១៥៦,៩៦ ពាន់លានប៉េសូ (២,៨០ ពាន់លានដុល្លារ) ខណៈដែលប្រទេសជប៉ុនបានសន្យាផ្តល់ប្រាក់ចំនួន ៣,៨២ ពាន់លានប៉េសូ (៦៨ លានដុល្លារ) និងហូឡង់បានសន្យាផ្តល់ប្រាក់ចំនួន ២,៦៥ ពាន់លានប៉េសូ (៤៧,២លានដុល្លារ)។

PSA បាននិយាយថា ការវិនិយោគសរុបដែលត្រូវបានអនុម័តរបស់ជនបរទេស និងជនជាតិហ្វីលីពីនបានឈានដល់ ៤៨០,៣៦ ពាន់លានប៉េសូ (៨,៥៥ ពាន់លានដុល្លារ) នៅក្នុងត្រីមាសទីមួយនៃឆ្នាំ ២០២៣ ពោលគឺខ្ពស់ជាង ១៥១,៨ ភាគរយក្នុងរយៈពេលដូចគ្នាកាលពីឆ្នាំមុន ហើយត្រូវបានគេរំពឹងថានឹងបង្កើតការងារដល់មនុស្សចំនួន ២៤,៤៥៣ នាក់៕