នៅក្នុងខែឧសភានេះ កម្ពុជាអាចនឹងនាំចេញប្រេងកាតរបស់ខ្លួនជាលើកដំបូងក្នុងប្រវត្តិសាស្ត្រ

ភ្នំពេញ៖ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពលលោក ជៀប សួរ នៅថ្ងៃទី១៨ ខែឧសភានេះ បានឱ្យដឹងថា ​ក្រុមហ៊ុន Kris Energy នឹងនាំចេញប្រេងកាតរបស់កម្ពុជាដែលបាននិងកំពុងដំណើរការបូម​នៅអណ្តូរអប្សរា ក្នុងប្លុក A ទៅកាន់ទីផ្សារអន្តរជាតិ នៅក្នុងខែឧសភា ឆ្នាំ២០២១នេះ​។

លោក ជៀប សួរ បានឱ្យដឹងដែរថា ការនាំចេញប្រេងឆៅជាលើកដំបូង និងជាប្រវត្តិសាស្ត្រសម្រាប់ប្រទេសកម្ពុជានេះ ក្នុងបរិមាណពី ២៧ម៉ឺន ទៅ ៣០ម៉ឺនប៉ារែល ដែលស្ថិតក្នុងនាវាផ្ទុកប្រេង (១បារ៉ែលស្មើនឹង ១៥៨.៩៩លីត្រ)។

លោកបញ្ជាក់​ថា «ក្រុមហ៊ុនរុករក និងបូមប្រេងរបស់សិង្ហបុរី Kris Energy នឹងនាំចេញប្រេងរបស់កម្ពុជា ទៅលក់នៅលើទីផ្សារអន្តរជាតិ នៅអំឡុងខែឧសភានេះ។ ចំពោះដំណាក់កាលដំបូងនេះ ក្រុមហ៊ុនអាចនឹង​នាំចេញ​ប្រេងឆៅ ក្នុងបរិមាណចន្លោះពី ២៧ម៉ឺនបារ៉ែល ទៅ៣០ម៉ឺនបារ៉ែល ហើយបរិមាណប្រេងនាំ​ចេញ​នេះ វាប្រែ​ប្រួលទៅតាមការវាស់វែងជាក់ស្តែង»។ លោកអគ្គនាយក មិនទាន់អាចបញ្ជាក់ជុំវិញការនាំចេញប្រេងឆៅលើកដំបូងរបស់កម្ពុជានេះ នឹងត្រូវបានដឹកទៅកាន់ទីផ្សារប្រទេសណា ហើយលក់ក្នុងតម្លៃប៉ុន្មានទេ? ព្រោះត្រូវពិនិត្យទៅតាមស្ថានភាពជាក់ស្ដែង។

គួរបញ្ជាក់ថា អណ្តូងប្រេងកាតចំនួន ៥ ក្នុងប្លុក A តំបន់អប្សរា ត្រូវបានដំណើរការបូមប្រេងចេញជាបន្តបន្ទាប់ ដោយទទួលបានប្រមាណ ២០០០បារ៉ែលប៉ុណ្ណោះក្នុង១ថ្ងៃ។

ដំណក់ប្រេងលើកដំបូង ជាប្រវត្តិសាស្ត្ររបស់កម្ពុជា ដែលជាប្រភពធនធានចំណូលថ្មីមួយ ត្រូវបានប្រកាសបូមបានពីប្លុក A ដែនសមុទ្រកម្ពុជា ត្រូវបានប្រមុខរាជរដ្ឋាភិបាលកម្ពុជា ប្រកាសឡើងកាលពីថ្ងៃទី២៩ ខែធ្នូ ឆ្នាំ២០២០។ ដោយរាជរដ្ឋាភិបាល នឹងយកចំណូលទទួលបានពីវិស័យប្រេងកាតនេះ នឹ​ងត្រូវផ្តល់អាទិភាព ទៅលើវិស័យអប់រំ និ​ងវិស័​យសុ​ខាភិ​បា​ល​៕