Connect with us

ព័ត៌មានសេដ្ឋកិច្ច

រដ្ឋមន្ត្រីក្រសួងកសិកម្មលើកឡើងថា ក្នុងរយៈពេល៥ខែ ឆ្នាំ២០២១នេះ ការប្រមូលផល​ស្រូវ ទទួលបានទិន្នផលច្រើន បើធៀបនឹងរយៈពេលដូចគ្នាកាលពីឆ្នាំមុន

ឯកឧត្ដម វេង សាខុន រដ្ឋមន្រ្ដីក្រសួងកសិកម្ម រុក្ខាប្រមាញ់ និងនេសាទបានលើកឡើងថា ដោយសារអាកាសធាតុអំណោយផលក្នុងរយៈពេល៥ ខែ ឆ្នាំ២០២១នេះ ធ្វើឱ្យកសិករ​ប្រមូលផលបានចំនួនច្រើន និងកើនឡើង បើប្រៀបធៀបទៅនឹងរយៈ​ពេល​ដូចគ្នា កាលពី ឆ្នាំ២០២០កន្លងមក ។

ថ្លែងក្នុងកិច្ចសម្ភាសន៍ជាមួយទូរទស្សន៍ជាតិកម្ពុជា(ទទក) នាព្រឹកថ្ងៃទី០១ ខែ មិថុនា ឆ្នាំ២០២១ ឯកឧត្តម វេង សាខុន បានគូសបញ្ជាក់ថា “ឆ្នាំនេះជាឆ្នាំល្អក្នុង​រយៈ​ពេល​៥ ខែ ដើមឆ្នាំនេះ ក្នុងទិន្នផលស្រូវប្រាំង ជាក់ស្តែងក្នុងផ្ទៃដីជាង ៦៤៦ពាន់ហិកតា ដាំដុះ បានផលជាង២លាន ៩សែន ៣ម៉ឺនតោន មានកំណើនច្រើន​ជាង​ឆ្នាំ២០២០ រហូត៣រយ ១៥ ពាន់តោន នេះជាលទ្ធផលមួយល្អ”។ ឯកឧត្តមរដ្ឋមន្ត្រីបានអះអាងថា មកដល់​ពេល នេះ ប្រជាកសិករបានចាប់ផ្តើមដាំស្រូវវស្សាបានសម្រេចជាង៣៦ភាគរយ ហើយ លើផ្ទៃដី គ្រោងដំាដុះប្រមាណជាង២លាន ៦សែនហិកតា ក្នុងនោះ ល្បឿនការងារបង្កបង្កើនផល ច្រើនជាងឆ្នាំកន្លងមកបានប្រមាណ៣រយពាន់ហិកតា។ ក្រៅពីដំណើរការលើកទិន្នផល ស្រូវឯកឧត្ដមរដ្ឋមន្ត្រីក៏បានលើកឡើងពីដំណាំឧស្សាហកម្មក៏មានចំនួនកើនឡើងផងដែរ ក្នុងនោះមានកំណើនជាង៤២ភាគរយ នៃផែនការ ដែលលើសឆ្នាំ ២០២០ ចំនួន ១១ ០០០ ហិកតា។

ឯកឧត្ដមបានឱ្យដឹងដែរថា ចំពោះការនាំចេញដំណាំកសិផលរបស់ប្រជាកសិករ ត្រូវបានចាត់ទុកថាជាឆ្នាំមួយជោគជ័យដែលមិននឹកស្មានដល់គឺការនាំចេញមានចំនួន​ជាង ៤លាន១៨៧តោន ក្នុងខណៈកាលពីឆ្នាំមុន រយៈពេលមួយឆ្នាំបានតែជាង៤លានតោន​ប៉ុណ្ណោះ។ ប៉ុន្ដែផ្ទុយទៅវិញ ក្នុងឆ្នាំ២០២១នេះ បើគិតចំនួនតែ៥ខែ គឺមានចំនួនកើនជាង​៤លានតោន ដែលនាំចេញទៅក្រៅប្រទេស គឺមានជាង៥០ប្រទេស​នៅទូទាំង​ពិភព​លោក។ ឯកឧត្ដមរដ្ឋមន្រ្ដីបានបន្ដថា ចំនួនកសិផលដែលនាំចេញត្រូវបានវាយ​តម្លៃតាម​រយៈភូគាមអនាម័យក្នុងរយៈពេល៥ខែ ឆ្នាំ២០២១នេះ គឺជាង៤លានតោន ដែលគិត​ជាទឹក ប្រាក់ប្រមាណ ២ ២៣៥ លានដុល្លារអាម៉េរិក ក្នុងនោះមានការនាំ អង្ករ  ស្រូវ  និងការនាំ ចេញកសិផលផ្សេងទៀត។ ទន្ទឹមនេះ កសិផលដែលនាំចេញក៏មានពោតក្រហម  និង​ស្វាយចន្ទី  ផងដែរ។

បើតាមឯកឧត្ដម វេង សាខុន ក្នុងឆ្នាំ២០២០កន្លងមក រយៈពេល៥ខែ ស្វាយចន្ទីបាន នាំចេញជាង២០០ពាន់តោន ចំណែករយៈពេល៥ខែ ឆ្នាំ២០២១ បាននាំចេញបានជាង​៨០០​ពាន់តោន  ដែលកើនជាងឆ្នាំកន្លងមក។ ឯកឧត្តមរដ្ឋមន្ត្រីបានបន្ថែម​ថា គោលដៅ​រយៈពេល៣ឆ្នាំខាងមុខ នឹងនាំចេញស្វាយចន្ទីឱ្យបាន១លានតោន។ ដោយឡែកចំពោះ ការចឹញ្ចឹមសត្វ ក៏មានសន្ទុះកើនឡើងដែរ ដោយក្នុងរយៈពេលប៉ុន្មានឆ្នាំខាង​មុខ​នេះ ក្រសួង​ដាក់ផែនការកាត់បន្ថយការនាំចូលពីក្រៅ ដោយបង្កើនការចិញ្ចឹមក្នុងស្រុកវិញ។ ជាមួយគ្នានេះ បើគិតពីពេលមុនមក គឺមានក្រុមហ៊ុននាំចូលសត្វប្រមាណជាង១០ក្រុមហ៊ុន តែពេលនេះបានកាត់បន្ថយនៅសល់ប្រមាណ៦ក្រុមហ៊ុនប៉ុណ្ណោះ។
ឯកឧត្ដមរដ្ឋមន្រ្ដីបានបញ្ជាក់បន្ថែមថា កាលពីពេលមុនក្នុងមួយថ្ងៃនាំចូលជ្រូក​ជាង​១​ម៉ឺនក្បាល ប៉ុន្ដែបច្ចុប្បន្នដោយថយមកត្រឹម ៨ ០០០ ក្បាល រហូតដល់៥០០ ក្បាល ឬ៣០០ក្បាលផងដែរ ហើយមូលហេតុកាត់បន្ថយការនាំចូលសត្វនេះ​ដោយសារក្រសួង​កសិកម្ម បានជំរុញឱ្យមានការចិញ្ចឹមក្នុងស្រុកមានសន្ទុះកើនឡើង៕

Click to comment

Leave a Reply

Your email address will not be published.

Facebook