Connect with us

ព័ត៌មានជាតិ

សាលារាជធានីប្រកាសប្រកាន់ជំហរដាច់ខាតត្រូវតែឲ្យជនជាតិវៀតណាម រុះ​រើ​ផ្ទះ​បណ្ដែត​ទឹក​​ និង​បែ​ចិញ្ចឹម​ត្រី​ ទៅតាម​កាល​កំណត់​

រាជធានីភ្នំពេញ៖ សាលារាជធានី​ភ្នំពេញ​បានបញ្ជាក់ថា​ អាជ្ញាធរ​រាជធានី​ នឹងមិនផ្លាស់ប្តូរ​ជំហរ​របស់ខ្លួនទេ​ ក្នុងការរៀបចំ​ដងទន្លេ​ឲ្យមានសណ្តាប់ធ្នាប់​ និងបរិស្ថាន​ ខណៈដែល​ នៅសល់តែ​មួយថ្ងៃទៀត​ប៉ុណ្ណោះ ​ឱសានវាទ​នៃការរុះរើ​ ឬចល័តផ្ទះទឹក​ និងបែចិញ្ចឹមត្រី​នៅតាមដងទន្លេ​ ក្នុងភូមិសាស្ត្រ​រាជធានីភ្នំពេញ​ នឹងដល់ថ្ងៃកំណត់​។​

លោក​ ម៉េត មាសភក្តី ​អ្នកនាំពាក្យ​សាលារាជធានី​ភ្នំពេញ ​នៅថ្ងៃអង្គារនេះថា ​សមត្ថកិច្ច​នឹងចុះអនុវត្ត​វិធានការ​រដ្ឋបាល​ រុះរើសំណង់​មិនរៀបរយ​ ផ្ទះបណ្តែតទឹក​ បែចិញ្ចឹមត្រី​ជាដើម​ នៅលើផ្ទៃទឹក​ក្នុងភូមិសាស្ត្ររាជធានី​ភ្នំពេញ ​ដោយមិនទទួល​ខុសត្រូវ​រាល់ការ​ខូចខាត​ ឬបាត់បង់​ណាមួយឡើយ ​ចំពោះអ្នកដែល​មិនគោរពតា​មសេចក្តី​ជូនដំណឹង​របស់​សាលារាជធានី​។

គួរជម្រាបថា កាលពីពេលថ្មីៗនេះ លោក វូ វាន ដាន អាយុ៦៧ឆ្នាំ បានអះអាងថា លោកគឺជាមេភូមិតំណាងឱ្យពលរដ្ឋវៀតណាមជាង៨០គ្រួសារ ដែលកំពុងរស់នៅលើផ្ទះបណ្ដែតទឹកនៅដងទន្លេបាសាក់ ស្ថិតនៅខាងមុខវត្តព្រែកប្រា សង្កាត់ព្រែកប្រាខណ្ឌច្បារអំពៅ។ កាលពីថ្ងៃសៅរ៍ទី៥មិថុនានេះ លោកបានប្រមូលយកប័ណ្ណស្នាក់នៅអចិន្ត្រៃយ៍របស់ជនអន្តោប្រវេសន្តវៀតណាមទាំងនេះ ដើម្បីដាក់ទៅខាងសមាគមវៀតណាមនិងទៅស្ថានទូតវៀតណាមប្រចាំកម្ពុជា ដើម្បីឱ្យជួយអន្តរាគមន៍ទៅកាន់រដ្ឋាភិបាលខ្មែរ ក្នុងការពិចារណាអនុញ្ញាតឱ្យក្រុមពលរដ្ឋរបស់លោក អាចបន្តរស់នៅលើទន្លេរហូតរយៈពេល៦ខែទៀត ឬដល់បំណាច់ឆ្នាំ២០២១នេះ បន្ទាប់ពីសាលារាជធានីភ្នំពេញបានកំណត់​ឱ្យពលរដ្ឋមានផ្ទះនិងបែចិញ្ចឹមត្រីនៅក្នុងទន្លេត្រូវរុះរើចេញឱ្យអស់ក្នុងអំឡុងត្រឹមតែមួយសប្ដាហ៍ ៕

Click to comment

Leave a Reply

Your email address will not be published.

Facebook