បាញ់ប្រហារក្នុងរដ្ឋតិចសាសសហរដ្ឋអាមេរិក របួស១៤នាក់

បាញ់ប្រហារយ៉ាងប្រល័យ នៅអាមេរិក បណ្តាលអោយមនុស្សចំនួន១៤នាក់ បានរងរបួស ក្រោយបុរស២នាក់បានបើកការបាញ់ប្រហារដាក់គ្នា នៅទីក្រុង Austin នៃរដ្ឋ Texas នាថ្ងៃសៅរ៍សប្តាហ៍នេះ (ពេលវេលាក្នុងតំបន់នៅសហរដ្ឋអាមេរិក)។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃអាទិត្យ ទី១៣ ខែមិថុនា ឆ្នាំ២០២១។

ប៉ូលិសទីក្រុង Austin បានឲ្យដឹងថា ហេតុការណ៍ផ្ទុះអាវុធនោះបានកើតឡើង នៅវេលាម៉ោងប្រហែល ០១៖៣០នាទីរំលងអធ្រាត្រឈាន ចូលថ្ងៃសៅរ៍ ទី១២ ខែមិថុនា នៅតំបន់ផ្លូវលេខ៦ ដែលជាតំបន់កន្លែងកម្សាន្តពេលរាត្រីដ៏អ៊ូអរមួយ ក្នុងទីក្រុងនេះ។ ក្នុងចំណោមជនរងគ្រោះទាំង១៤នាក់ មាន២នាក់របួសធ្ងន់និងកំពុងស្ថិតក្នុងមន្ទីរពេទ្យ ខណៈ១២នាក់ទៀត ស្ថិតនៅសភាពនឹងនរ ហើយពុំមានអ្នកបាត់បង់ជីវិតឡើយ។

គួរបញ្ជាក់ថា ជនសង្ស័យម្នាក់ក្នុងករណីបាញ់ប្រហារខាងលើ ត្រូវប៉ូលិសទីក្រុង Austin ឃាត់ខ្លួនបាន ខណៈម្នាក់ទៀត កំពុងស្ថិតក្រោមការស្វែងរក ដើម្បីឃាត់ខ្លួនដូចគ្នា៕