Connect with us

ព័ត៌មានជាតិ

អភិបាលខេត្តកណ្តាល ចូលរួមដោះស្រាយផលប៉ះពាល់ជាមួយប្រជាពលរដ្ឋរស់នៅតាមដងផ្លូវជាតិលេខ២១

(កណ្តាល)៖ ដោយមានតម្រូវការចាំបាច់ ក្នុងការរៀបចំ សណ្តាប់ធ្នាប់សាធារណៈ នៅលើចំណីផ្លូវជាតិលេខ២១ ត្រង់ចំណុចចន្លោះគ.ម ៨+៣៧៨ ដល់ គ.ម ៨+៧៣០ ក្នុងភូមិទួលក្រសាំង សង្កាត់រកាខ្ពស់ ក្រុងតាខ្មៅ ដោយមានការប៉ះពាល់ដល់ផ្ទះសម្បែងរបស់ប្រជាពលរដ្ឋចំនួន ២៤គ្រួសារ ដែលបានរស់នៅអាស្រ័យផលលើដីចំណីផ្លូវជាតិនេះ ក្រុមការងារបានធ្វើការប្រជុំសម្របសម្រួលជាច្រើនលើកច្រើនសារ ប៉ុន្តែនៅថ្ងៃ៧កើត ខែបឋមាសាឍ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃពុធ ទី១៦ ខែមិថុនា ឆ្នាំ២០២១ ដោយមានការចូលរួមពី ឯកឧត្តម គង់ សោភ័ណ្ឌ អភិបាលខេត្តកណ្តាល ទើបមានការឯកភាពគ្នា។
ឯកឧត្តម គង់ សោភ័ណ្ឌ អភិបាលខេត្តកណ្តាល មានប្រសាសន៍ថា ជានិច្ចកាលសម្តេចតេជោដែលតែងតែបានគាំទ្រ និងផ្តល់នូវអនុសាសន៍ដឹកនាំដ៏ខ្ពង់ខ្ពស់ ប្រកបដោយគតិបណ្ឌិត និងដាក់ចេញនូវគោលនយោបាយ ឈ្នះ-ឈ្នះ ជាវិធីសាស្រ្តដ៏ប្រសើរបំផុតក្នុងការដោះស្រាយទុក្ខកង្វល់ ជូនប្រជាពលរដ្ឋប្រកបដោយភាពយុត្តិធម៌បំផុត ហើយក៏សូមអរគុណចំពោះការខិត ខំរបស់ក្រុមការងារពាក់ព័ន្ធទាំងអស់ ដែលបានខិតខំបំពេញការងារប្រកបដោយភាពទន់ភ្លន់ និងស្មារតីទទួលខុសត្រូវខ្ពស់ រហូតទទួលបានជោគជ័យដ៏ត្រចេះត្រចង់នាពេលនេះ។

ឯកឧត្តម មានប្រសាសន៍បន្តថា ជាពិសេសសូមអរគុណដល់បងប្អូនប្រជាពលរដ្ឋទាំង២៤គ្រួសារ ដែលរីករាយចូលរួមសហការជាមួយ ក្រុមការងារជំនាញពាក់ព័ន្ធរបស់យើង រហូតបញ្ចប់វិវាទនេះប្រកបដោយស្នាមញញឹម ។
ឯកឧត្តម ក៏បានអំពាវនាវដល់បងប្អូនប្រជាពលរដ្ឋមួយចំនួនផ្សេងទៀត សូមកុំនាំគ្នាមករស់នៅលើចំណីផ្លូវសាធារណៈ ជាហេតុធ្វើឱ្យខូចសណ្តា ប់ធ្នាប់សាធារណៈ បាត់បង់សោភណភាពទីក្រុងរបស់យើង។

ដំណោះស្រាយជាក់ស្តែងលើកនេះ បងប្អូនប្រជាពលរដ្ឋទាំង២៤គ្រួសារ បានរីករាយចូលរួមសហការជាមួយក្រុមការងារពាក់ព័ន្ធ យល់ព្រមទទួលយកនូវសំណង នៃការដោះស្រាយផលប៉ះពាល់នេះ ដោយឈរលើគោលការណ៍ ឈ្នះ-ឈ្នះ ទាំងអស់គ្នា ក្នុងកម្រិតមួយដ៏សមរម្យបំផុត៕

Click to comment

Leave a Reply

Your email address will not be published.

Facebook