Connect with us

ព័ត៌មានសេដ្ឋកិច្ច

មន្ទីរកសិកម្មខេត្តប៉ៃលិនជំរុញដល់ប្រជាកសិករឱ្យចូលរួមវិនិយោគដំឡូងមី

(ប៉ៃលិន)៖ មន្ទីរកសិកម្មខេត្តប៉ៃលិន បានជំរុញការវិនិយោគរបស់ប្រជាកសិករលើខ្សែចង្វាក់តម្លៃដំឡូងមីលើទីផ្សារ ខណៈដែលទីផ្សារដំឡូងមីនៅខេត្តនេះកំពុងមានទីផ្សារខ្ពស់ ។

លោកសាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន បានមានប្រសាសន៍ថា នៅដើមរដូវវស្សាឆ្នាំនេះ អាកាសធាតុពិតជាអំណោយផលដល់ដំណាំកសិកម្ម ដូចជាដំឡូងមីជាដើម ដែលធ្វើឱ្យកសិករក្នុងខេត្តប៉ៃលិន សប្បាយ រីករាយយ៉ាងខ្លាំង ខណៈដំណាំរបស់ពួកគាត់ លូតលាស់បានល្អ ដោយពួកគាត់មានសង្ឃឹម ថា នៅពេលប្រមូលផលខាង មុខ នឹងទទួលបានទិន្នផលខ្ពស់ ។ លោកបន្តថា មកដល់ ពេលនេះ ប្រជាកសិករនៅខេត្តប៉ៃលិន ដាំដំឡូងមីបាន ១០០ភាគរយហើយ លើផ្ទៃដី៤៣០០០ ហិកតា ។ ទទ្ទឹមនេះ មន្ទីរកសិកម្មបានណែ នាំដល់ប្រជាកសិករ នៅពេលប្រមូលផលដំឡូង ត្រូវលក់ឱ្យចំទីផ្សារគោលដៅ ដើម្បីទទួលបានតម្លៃថ្លៃ ។

“យើងជំរុញឱ្យគាត់ប្រមូលផ្ដុំគ្នា ជាសហគមន៍ចងក្រងលក់រួមគ្នា ឱ្យគាត់ទទួលបានតម្លៃខ្ពស់ ហើយនៅពេលដែលដំណាំប្រមូលផល គឺយើងត្រូវពិនិត្យលើទីតាំង ទីផ្សារដែលយើងត្រូវលក់ ថាតើនៅខែណា យើងលក់ដំឡូងក្រៀម ហើយខែណាយើងលក់ដំឡូងស្រស់ ត្រូវដឹងច្បាស់លាស់ ហើយមួយទៀត យើងត្រូវព្យាយាមរក្សាពូជទុកឱ្យបានល្អ ឱ្យគ្រប់គ្រាន់ ជៀសវាងការដាំពូជដែលមិនទទួលបានលទ្ធផល ហើយនេះជាអ្វីដែលកសិករយើងយកចិត្តទុកដាក់ខ្លាំងជាងគេ ដឹងពីព័ត៌មានទីផ្សារ គិតថាយើងប្រមូលផលបណ្ដើរៗ ប្រជាកសិករកុំប្រមូលផលទាំងអស់គ្នា សម្រុកទៅទីផ្សារតែម្តង ធ្វើឱ្យដំឡូងមីរបស់យើងធ្លាក់តម្លៃទាបគឺ ឱ្យប្រជាកសិករយើងប្រមូលទៅតាមតម្រូវការដែលគេទិញប្រើប្រាស់”។

លោកបន្ថែមថា ក្រោយពីប្រជាកសិករដាំរួចរាល់បាន ១០០ភាគរយហើយនោះ មន្ទីរបានចុះណែនាំពីការប្រើប្រាស់ជីឱ្យបានសមស្រប ថែទាំចម្ការដំឡូងមី កម្ចាត់សត្វល្អិត ដើម្បីឱ្យប្រជាកសិករទទួលបានទិន្នផលច្រើន ។
សូមបញ្ជាក់ថា នៅខេត្តប៉ៃលិនមានប្រជាកសិករដាំដំឡូងមីច្រើនប្រភេទ ដូចជា ពូជ៨១, ពូជ៨៩, ពូជរាក់យ៉ងកែវ និងពូជគុយបុង ដែលជាពូជទទួលបានទិន្នផលខ្ពស់៕

Click to comment

Leave a Reply

Your email address will not be published.

Facebook