ប្រទេសឥណ្ឌូណេស៊ីត្រូវបានជ្រើសរើសជាតំណាងអាស៊ីនៅក្នុងអង្គការស្បៀងអាហារ និងកសិកម្ម

(ភ្នំពេញ)៖ ប្រទេសឥណ្ឌូណេស៊ីត្រូវបានបោះឆ្នោតជ្រើសរើសចូលទៅក្នុងក្រុមប្រឹក្សានៃអង្គការស្បៀងអាហារ និងកសិកម្ម (FAO) នៅក្នុងសម័យប្រជុំលើកទី ៤២ នៃសន្និសីទអង្គការ FAO ដែលបានធ្វើឡើងកាលពីថ្ងៃទី ១៤ ដល់ថ្ងៃទី ១៨ ខែមិថុនា។

ប្រទេសឥណ្ឌូណេស៊ី គឺជាអ្នកតំណាងនៃក្រុមប្រចាំតំបន់អាស៊ី រួមជាមួយប្រទេសនៅអាស៊ីចំនួន ៥ ផ្សេងទៀត គឺបង់ក្លាដែស ចិន ជប៉ុន ហ្វីលីពីន និងកូរ៉េខាងត្បូង សម្រាប់រយៈពេលសម្រាប់ឆ្នាំ ២០២១-២០២៤។

ថ្លែងនៅក្នុងសន្និសីទសារព័ត៌មានមួយកាលពីថ្ងៃទី ២១ ខែមិថុនា រដ្ឋមន្ត្រីក្រសួងកសិកម្មឥណ្ឌូណេស៊ី លោក Syahrul Yasin Limpo បាននិយាយថា ការបោះឆ្នោតនេះ គឺជាទម្រង់នៃការទទួលស្គាល់ជាអន្តរជាតិអំពីការរីកចម្រើននៃវិស័យកសិកម្មរបស់ឥណ្ឌូណេស៊ី។

លោកបានកត់សម្គាល់ថា កម្មវិធីអភិវឌ្ឍវិស័យកសិកម្មក្រោមការដឹកនាំរបស់លោកប្រធានាធិបតីឥណ្ឌូណេស៊ី លោក ចូកូ វីដូដូ បានបន្តបង្កើតលទ្ធផលវិជ្ជមានសម្រាប់ការអភិវឌ្ឍសេដ្ឋកិច្ច។

លោក Limpo បាននិយាយថា កម្មវិធីនេះត្រូវបានគេរំពឹងថានឹងដាក់ចេញនូវពណ៌គោលនយោបាយកសិកម្មពិភពលោក និងជម្រុញប្រទេសដទៃទៀត ហើយឥណ្ឌូណេស៊ីអាចដើរតួនាទីក្នុងការផ្គត់ផ្គង់ស្បៀងអាហារដល់សហគមន៍ពិភពលោក។

តាមរយៈសមាជិកភាពនៅក្នុងក្រុមប្រឹក្សានោះ ប្រទេសនេះអាចចូលរួមចំណែកក្នុងការបង្កើតគោលនយោបាយរបស់អង្គការ FAO ផ្សេងៗទៀតដែលគាំទ្រដល់កិច្ចខិតខំប្រឹងប្រែងរបស់រដ្ឋជាសមាជិកអង្គការសហប្រជាជាតិដើម្បីសម្រេចបានគោលដៅអភិវឌ្ឍប្រកបដោយចីរភាពក្នុងចំណោមប្រទេសដទៃទៀត៕