ព័ត៌មានជាតិ
អនុប្រធានទី១ អាជ្ញាធរមីនចាត់ទុក UNDP គឺជាដៃគូការងារដ៏រឹងមាំក្នុងការស្វែងរកការគាំទ្រទាំងផ្នែកថវិកា សម្ភារ និងការផ្តល់ប្រឹក្សាបច្ចេកទេសដល់កម្ពុជា
(ភ្នំពេញ)៖ ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនបានចាត់ទុកអង្គការ UNDP គឺជាដៃគូការងារដ៏រឹងមាំ និងធ្វើការងារមិនខ្លាចការនឿយហត់ ជាមួយអាជ្ញាធរមីន ដែលបានចូលរួមយ៉ាងសកម្ម ក្នុងការស្វែងរកការគាំទ្រ ដល់គម្រោងបោសសម្អាតមីន ដើម្បីលទ្ធផលទាំងផ្នែកថវិកា សម្ភារ និងការផ្តល់ប្រឹក្សាបច្ចេកទេសជួយដល់កម្ពុជា។ ការលើកឡើងរបស់ឯកឧត្ដមទេសរដ្ឋមន្រ្ដីនេះ ក្នុងឱកាសអនុញ្ញាតឱ្យលោក Nick Beresford តំណាង UNDP ប្រចាំនៅកម្ពុជា បានអញ្ជើញចូលជួបសម្តែងការគួរសម និងជម្រាបលាក្នុងការបញ្ចប់អាណតិ្តបេសកកម្មរយៈពេល ០៥ឆ្នាំ នាព្រឹកថ្ងៃទី២២ ខែមិថុនា ឆ្នាំ២០២១ នៅអគ្គលេខាធិការដ្ឋានអាជ្ញាធរមីន។ នេះបើយោងតាមផេកហ្វេសប៊ុកផ្លូវការរបស់ឯកឧត្តមទេសរដ្ឋមន្ត្រី លី ធុជ។
ឯកឧត្តមទេសរដ្ឋមន្ត្រី លី ធុជ បានគូសបញ្ជាក់ថា ក្នុងនាមរាជរដ្ឋាភិបាលកម្ពុជា បានថ្លែងអំណរគុណ និងវាយតម្លៃខ្ពស់ចំពោះអង្គការ UNDP ដែលបានចូលរួមចំណែកគាំទ្រដល់ការងារអភិវឌ្ឍន៍នៅកម្ពុជាលើគ្រប់វិស័យ ក្នុងនោះវិស័យបោសសម្អាតមីនតាមរយៈគម្រោងបោសសម្អាតមីន ដើម្បីលទ្ធផល ចាប់តាំងពីឆ្នាំ២០០៦ រហូតដល់ឆ្នាំ២០២៥ UNDP បានកៀរគរនូវធនធានសរុបថវិកាប្រមាណ ៨៤ ៨៦០ ៨៩៥ ដុល្លារអាម៉េរិក ផ្តោតលើខេត្តបាត់ដំបង ប៉ៃលិន និងខេត្ដបន្ទាយមានជ័យ។ ឯកឧត្ដមទេសរដ្ឋមន្រ្ដីបានលើកឡើងថា គម្រោងទាំងនោះក្រោមការចូលរួមផ្តល់ជំនួយគាំទ្រពីបណ្តាប្រទេសម្ចាស់ជំនួយ និងដៃគូអភិវឌ្ឍន៍ រួមមាន៖ រាជរដ្ឋាភិបាលកម្ពុជា អង្គការសហប្រជាជាតិ(UN) អូស្រា្តលី កាណាដា សាធារណរដ្ឋកូរ៉េ ស្វីស អេស្ប៉ាញ សហរដ្ឋអាមេរិក អូទ្រីស អង់គ្លេស ន័រវេស ស៊ុយអែត អៀរឡង់ ប៊ែលហ្សិក និងបារាំង ដែលក្នុងនោះអង្គការ UNDP បានរួមចំណែកថវិកាសរុប ៦ ០៧៩ ៧៩៩ ដុល្លារអាម៉េរិក។
ឯកឧត្ដមទេសរដ្ឋមន្រ្ដីបានបន្ថែមថា ដោយមានការសម្របសម្រួលរបស់លោក Nick Beresford ចាប់ពីឆ្នាំ២០១៦ លោកបានខិតខំប្រឹងប្រែងកៀរគរនូវធនធានគិតជាថវិកាសរុប ៣២ ២៣១ ៤១៩ ដុល្លារអាម៉េរិក ដែលនឹងត្រូវប្រើប្រាស់រហូតដល់ឆ្នាំ២០២៥ ក្នុងការគោលដៅបញ្ចប់ការគំរាមកំហែងដោយសារមីន ស្របតាមចក្ខុវិស័យរបស់រាជរដ្ឋាភិបាលកម្ពុជា។
លោក Nick Beresford បានសម្ដែងនូវសេចក្តីសប្បាយរីករាយដែលលោកបានបំពេញការងារនៅកម្ពុជា ព្រមទាំងទទួលបាននូវកិច្ចសហប្រតិបត្តិការយ៉ាងល្អ និងការគាំទ្រពីរាជរដ្ឋាភិបាលកម្ពុជា លើការរួមចំណែកអភិវឌ្ឍន៍នៅកម្ពុជា ក្នុងនោះរួមមានការងារបោសសម្អាតមីន មនុស្សធម៌ ដែលបានចូលរួមចំណែកក្នុងផ្តល់ដីមានសុវត្ថិភាពជូនប្រជាពលរដ្ឋនៅទីជនបទ និងកាត់បន្ថយអត្រាគ្រោះថ្នាក់ដោយសារមីន។
សូមបញ្ជាក់ផងដែរថា ក្នុងបេសកកម្មរយៈពេល ០៥ឆ្នាំនេះ សម្រាប់វិស័យសកម្មភាពមីនមនុស្សធម៌ លោក Nick Beresford បានទទួលនូវមេដាយសហមេត្រី ថ្នាក់មហាសិរីវឌ្ឍន៍ ពីរាជរដ្ឋាភិបាលកម្ពុជាក្នុងឱកាសប្រារព្ធសន្និបាតជាតិវិស័យសកម្មភាពមីន ក្រោមអធិបតីភាពដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា កាលពីថ្ងៃទី១៧ ខែឧសភា ឆ្នាំ២០១៨៕
ចំណងដៃថ្មី សម្រាប់ប្រជាពលរដ្ឋរស់នៅភូមិពូត្រុំ (ដំរីជាន់) ក្នុងសង្កាត់រមនា ទទួលបានផ្លូវក្រាលកៅស៊ូ ប្រវែង២.៥០០ម៉ែត្រ
ព្រឹកនេះសម្តេចតេជោនាយករដ្ឋមន្រ្តី អញ្ជើញសម្ពោធដាក់ឱ្យប្រើប្រាស់ស្ពានឆ្លងទន្លេសាប និងស្ពានអាកាសឫស្សីកែវ
សាកលវិទ្យាល័យស្វាយរៀង និង សមាគមអ្នកស្រាវជ្រាវវឌ្ឍនភាពកម្ពុជា-ចិន រួមគ្នាពន្លាតការយល់ដឹងទស្សនវិជ្ជាចិនស្តីពី«កិច្ចកសាងសហគមន៍ជោគវាសនារួមនៃមនុស្សជាតិ»
កម្មវិធីសម្ពោធសាលាដំណាក់សមត្ថិផលថ្មី ប្រសូតចេញពីការរួមគ្នារបស់ពុទ្ធសាសនិកជន
នំបញ្ចុកសៀមរាប ផលិតឡើងតាមរូបមន្តពីបុរាណរបស់អ្នកឃុំព្រះដាក់ ត្រៀមចុះបញ្ជីម៉ាកសមូហភាព ដើម្បីលើកកម្ពស់ភាពប្រកួតប្រជែងនៅលើទីផ្សារ
