Connect with us

ព័ត៌មានសេដ្ឋកិច្ច

ឯកឧត្តម ជា សុផារ៉ា៖ គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចបានចូលរួមចំណែកក្នុងការកាត់បន្ថយភាពក្រីក្រ និងបង្កើនជីវភាពរស់នៅ

(ភ្នំពេញ)៖ ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និង សំណង់ និងជាប្រធានគណៈកម្មការដឹកនាំគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចដំណាក់កាលទី ៣ (LASED III) បានថ្លែងតាមប្រព័ន្ធអនឡាញក្នុងពិធីបើកសិក្ខាសាលាផ្សព្វផ្សាយស្តីពីការចាប់ផ្ដើមអនុវត្តគម្រោង (LASED III) នៅព្រឹកថ្ងៃទី២៤ខែមិថុនាឆ្នាំ២០២១នេះថា គម្រោងនេះនឹងចូលរួមចំណែកក្នុងការកាត់បន្ថយភាពក្រីក្រ បង្កើនជីវភាពរស់នៅ និងពង្រីកប្រព័ន្ធហេដ្ឋារចនាសម្ព័ន្ធរូបវន្តដែលមានគុណភាព និងធន់នឹងការប្រែប្រួលអាកាសធាតុ។

ឯកឧត្តម ឧបនាយករដ្ឋមន្ត្រី បានគូសបញ្ជាក់ថា គម្រោងរបស់រាជរដ្ឋាភិបាលមួយនេះ នឹងផ្តល់ដីលំនៅឋាននិងដីសម្រាប់ធ្វើកសិកម្មដល់ប្រជាជនក្រីក្រ សម្រាប់ជាទុនក្នុងការកសាងជីវិតរស់នៅ និងបង្កបង្កើនផល។ ជាមួយនោះ គម្រោងនឹងបណ្តុះបណ្តាលការធ្វើកសិកម្ម ការផ្សារភ្ជាប់ជាមួយទីផ្សារ កសាងហេដ្ឋារចនាសម្ព័ន្ធមូលដ្ឋាន ដើម្បីបង្កើនកម្រិតជីវភាពរស់នៅ កាត់បន្ថយចំណាកស្រុក និងកាត់បន្ថយភាពក្រីក្ររបស់ប្រជាពលរដ្ឋ ចូលរួមសម្រេចគោលបំណងនៃយុទ្ធសាស្ត្រចតុកោណ ដំណាក់កាលទី៤ ដែលជារបៀបវារៈសង្គម សេដ្ឋកិច្ច របស់រាជរដ្ឋាភិបាល នីតិកាលទី៦ នៃរដ្ឋសភា។
បើតាម ឯកឧត្តម ឧបនាយករដ្ឋមន្ត្រី ជា សុផារ៉ា គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ មានថវិកាសរុប ១០៧ លានដុល្លារអាម៉េរិក ក្នុងនោះឥណទានធនាគារពិភពលោកចំនួន ៩៣លានដុល្លារ និងថវិកាបដិភាគរបស់រាជរដ្ឋាភិបាលចំនួន ១៤លានដុល្លារ សហការអនុវត្តដោយក្រសួងរៀបចំដែនដី នគរូបនីយកម្ម និងសំណង់ និងក្រសួងកសិកម្ម រុក្ខាប្រមាញ់ និងនេសាទ សម្រាប់រយៈពេល៦ឆ្នាំ ពីខែតុលា ឆ្នាំ២០២០ ដល់ខែធ្នូ ឆ្នាំ២០២៦ នៅទីតាំងចំនួន ៧១ ក្នុងនោះ ២៦ទីតាំង សម្រាប់ការងារសម្បទានដីសង្គមកិច្ច និង ៤៥ទីតាំង សម្រាប់សហគមន៍ជនជាតិដើមភាគតិច មានផ្ទៃដីសរុប ៣០ ០០០ហិកតា ក្នុងនោះផ្ទៃដីសហគមន៍ជនជាតិដើមភាគតិច ១០ ០០០ហិកតា និងមានអ្នកទទួលផលសរុប ៦ ៥០០គ្រួសារ ក្នុងនោះសហគមន៍ជនជាតិដើមភាគតិច ១ ៥០០គ្រួសារ។

សកម្មភាពរបស់គម្រោងផ្តោតលើការងារសំខាន់ចំនួន៥ គឺការងារសម្បទានដីសង្គមកិច្ច, ការចុះបញ្ជីដីសហគមន៍ជនជាតិដើមភាគតិច, ការធ្វើផែនការប្រើប្រាស់ដីនៅក្នុងឃុំ,ការអភិវឌ្ឍប្រព័ន្ធហេដ្ឋារចនាសម្ព័ន្ធរូបវន្ត និងការគាំទ្រដល់ការអភិវឌ្ឍជីវភាពរស់នៅរបស់អ្នកទទួលផល។ សូមបញ្ជាក់ថា សិក្ខាសាលាតាមប្រព័ន្ធអនឡាញដើម្បីផ្សព្វផ្សាយការចាប់ផ្តើមអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី ៣ (LASED III) ត្រូវបានរៀបចំឡើងក្នុងគោលបំណងផ្សព្វផ្សាយអំពីការចាប់ផ្តើមការអនុវត្តគម្រោង LASED III ដែលក្នុងនោះរួមមាន៖
១)ផ្សព្វផ្សាយអំពីទិដ្ឋភាពទូទៅនៃគម្រោងដល់អ្នកពាក់ព័ន្ធ និងមុខសញ្ញាអ្នកទទួលផល និង ២)បង្ហាញអំពីការងាររបស់សមាសភាគសំខាន់ៗទាំង៤នៃការអនុវត្តគម្រោង៕

Click to comment

Leave a Reply

Your email address will not be published.

Facebook