អាជ្ញាធរ​របប​សឹកភូមា ដុត​បំផ្លាញ គ្រឿង​ញៀន គិតជា​ទឹកប្រាក់​ប្រមាណ​ជាង​៦០០លាន​ដុល្លារ

ភូមា៖ នៅក្នុងទិវា​អន្តរជាតិប្រឆាំងគ្រឿងញៀន ថ្ងៃទី២៦មិថុនានេះ អាជ្ញាធររបបសឹក​ភូមា បានធ្វើការដុតកំទេចចោលគ្រឿងញៀន ដែលខ្លួនរឹបអូសបាន គិតជាទឹកប្រាក់​ប្រមាណ ជាង៦០០លានដុល្លារ សហរដ្ឋអាមេរិក។ សូមបញ្ជាក់ថា គ្រឿងញៀន អាភៀន ថ្នាំហេរ៉ូអ៊ីន និង ម៉េតំហ្វេតេមីន ក្នុងចំនួន​ដ៏ច្រើនសន្ធឹក ត្រូវបានផលិត​នៅក្នុងប្រទេសភូមា មុននឹងចែកចាយបន្ត នៅតាមប្រទេសអាស៊ីអាគ្នេយ៍។

នៅទីក្រុងរ៉ង់ហ្គូន អាជ្ញាធរភូមាបានអញ្ជើញអ្នកកាសែត ឲ្យចូលរួម យកព័ត៌មាន ថតរូបភាព នៃសកម្មភាព​ដុតបំផ្លាញគ្រឿងញៀន ដែលគេច្រកក្នុងបាវ មានដូច កញ្ឆា គ្រាប់ថ្នាំញៀនពណ៌ផ្កាឈូក ថ្នាំញៀនហេរ៉ូអ៊ីន និងថ្នាំញៀនច្រើនប្រភេទផ្សេងទៀត។ ផ្សែងខ្មៅខ្លួលខ្មាញ់ បានហោះគួរ​ត្របាច់ បន្ទាប់ពីអាជ្ញាធរបានដុតបំផ្លាញ​គ្រឿងញៀនទាំងនេះ។

សកម្មភាព​ដុតបំផ្លាញគ្រឿងញៀនដូចគ្នា​នេះ គឺត្រូវ​បាន​អាជ្ញាធររបបសឹក​ភូមា រៀបចំធ្វើផងដែរ នៅទីតាំងផ្សេងទៀត ដូចជានៅទីក្រុង​ម៉ាន់ដាឡេ ទីក្រុងតូងជី និងនៅរដ្ឋហ្សានជាដើម ក្នុងឱកាសទិវា​អន្តរជាតិ​ប្រយុទ្ធប្រឆាំង​នឹង​ការជួញដូរ​គ្រឿងញៀន ថ្ងៃទី​២៦មិថុនា​ ។ ជាសរុប អាជ្ញាធរ​របប​​​​​សឹក​​ភូមា បានដុតបំផ្លាញគ្រឿងញៀន គិតជាទឹកប្រាក់ចំនួន ៦៦៨​លាន​ដុល្លារ ដែលក្នុងនោះគឺ មានថ្នាំគ្រាប់មេតំហ្វេតាមីន ចំនួន​២២៤លានគ្រាប់។ នេះបើផ្អែកតាម​តួលេខ​របស់​នគរបាលភូមា។

គួរបញ្ជាក់ថា ភូមា គឺជាប្រទេសធំទី២ ដែលដាំនិងផលិតអាភៀន ច្រើនជាងគេបំផុត លំដាប់ទី២ បន្ទាប់​ពីអាហ្វហ្កានីស្ថាន។ ភូមាក៏ជាប្រទេសដ៏សំខាន់មួយផងដែរ ដែលផលិត​ថ្នាំគ្រាប់មេតំហ្វេតាមីន ច្រើនជាងគេបង្អស់។ យោងតាមអង្គការសហប្រជាជាតិ រដ្ឋហ្សាន ស្ថិតនៅភាគខាងជើងភូមា គឺជាដែនដី ប្រភព​ធំបំផុត​នៃការ​ផលិត​គ្រឿងញៀន​ដុំរឹង​ដូចគ្រីស្តាល់ ដែល​មាន​សារធាតុញៀនខ្ពស់ ហើយ​ដែលគេនាំចេញបន្តទៅ អូស្ត្រាលី និងជប៉ុនជាដើម ដើម្បីកែច្នៃ។ រដ្ឋហ្សាន ស្ថិតនៅក្នុងតំបន់​ត្រីកោណមាស​ ជាប់ព្រំដែន​ជាមួយថៃ និងឡាវ ត្រូវគេស្គាល់ជាច្រើនទសវត្ស​មកហើយ ថាជាជង្រុក​គ្រឿងញៀន។

ប្រភពពីអង្គការសហប្រជាជាតិដដែល បញ្ជាក់ថា ថ្វីបើមានបំរាម​ហាមឃាត់​ធ្វើដំណើរ នៅក្នុងបរិបទ​កូវីដ​១៩ ប្រមាណ​​ជាង១ឆ្នាំមកនេះក្តី តែ​ទីផ្សារ​នៃ​ការជួញដូរ​​ថ្នាំញៀន ប្រភេទ​មេតំហ្វេតាមីន នៅតែកើន​ឡើង​ជាលំដាប់ នៅក្នុងតំបន់​អាស៊ីអាគ្នេយ៍។ ក្រុមឈ្មួញ​ទុច្ចរិត នៅតែ​អាចបំពាន​ គេចវិះ​ពី​ការ​ហាមឃាត់ បាន​ជានិច្ច ខណៈ​ទំហំនៃ​ការប្រើប្រាស់​ថ្នាំញៀន កាន់តែ​រីកធំ៕